EMPA – ماستر الادارة العامة

مرحبا الغالية

كل المعلومات إللي تحتاجينها موجودة في موقع جامعة زايد وبالتفصيل

وهذا الرابط : http://www.zu.ae/
وهذا رابط ثاني دايركت لبرنامج الماجستير http://www.zu.ac.ae/emba/home/home.html

ويسامحونا المشرفات على الرابط تراه خارج المنتدى صح بس لجامعة مب منتدى ثاني ..

والله يوفقج فديتج .. كل المعلومات موجودة وواضحة بس بالإنجليزي أكيد ورقمهم موجود بعد …

كنت باخذ هالماستر بس هونت … لأنه فيه statistics وأنا ما فيه .. يالسة أدور ماجستير ثاني في جامعة نيويورك في بوظبي بس ما يتحصلون ..غربلوني

اول مره اسمع عن ها الماستر ..اعتقد انج تقصدين MBA

عموما هذا يحتاج منج انج تكونين دارسة بزنس (يفضل) او اشتغلتي في مجال البزنس فتره معينه

البرنامج اللي في جامعة زايد excutive يعني اصعب من العادي ومكثف حق الناس اللي اوريدي عندهم خبره طويله في مجال البزنس يعني بيكون اصعب لج من ال MBA العادي

اانا وربيعتي درنا الجامعات كلها عشان نسجل انا سجلت ماستر ثاني وهيه كانت تبا ماستر الاداره بعد جولة في جامعات الدوله الخاصه والحكوميه اللي في دبي والشارجه وبوظبي هيه استقرت على جامعه موجوده في قرية المعرفه وايد برنامج الاداره مالهم مرن ونظامهم وايد مريح مسواي للناس اللي ما يكونون فاظين والحمد لله هيه بدت من ست شهور الحينه ومرتاحه هناك ويوم اقارن نظامهم بنظام الجامعه اللي انا ادرس فيها احس ان نظامهم واااايد مرن ومريح خصوصا انها تشتغل الصبح وتدرس العصر..

شي ثاني مش كل الجامعات تطرح نفس المواد في ها التخصص فيه جامعات تطرح 12 ماده في ها الماستر وفيه جامعات تطرح اكثر من 12 ماده.. فيه جامعات موادها تركز ع السياسات والاستراتيجيات في الاداره وفي جامعات موادها تركز ع اتجاه ثاني في ها الماستر ف انتي لازم تسيرين جامعه جامعه اذا انتي من دبي راسلي وزارة التعليم العالي وخذي قايمة الجامعات المعترف فيها من عندهم وسيري قرية المعرفه ودخلي جامعه جامعه وسيري مكتب التسجيل مالهم واساليهم وبيعطونج كل المعلومات والكتيبات وبتاخذين فكره اوضح عن نظام كل جامعه وبتقدرين تقارنين احسن

من الجامعات القديمه في ها البرنامج الجامعه الاستراليه واحس غالبية اللي يدرسون ماستر اداره يا من الاستراليه باعتبار انها من اوائل الجامعات اللي عطت ماستر في ها المجال في الدوله او انهم يدرسون في الامريكيه باعتبارها من الجامعات القويه

نوع الجامعه او الدوله لي تنتمي لها الجامعه له دور في طريقة التعليم يعني مثلا الاستراليه والبريطانيه يعتمدن وايد على انج انتي تقرين وتدورين وتسيرين تسوين الامريكي لا يعطيج شوي اكثر يعني يسويلج سبون فيدنج ع قولتهم بس ربع ملعقه مش اكثر اما الجامعات الاستراليه والبريطانيه ما فيه شي اسمه سبون فيدنج لازم انتي تكرفين وتدورين

اممممم بالنسبه للدراسه طبعا تكون عندج محاضرات خلال الكورس و assignments تسوينهم وامتحان فاينل في نهاية الكورس .. عشان تاخذين الماستر ويتسجل لج في الوزاره لازم تكون درجاتج فوق ال 65 حسب معلوماتي يعني لازم معدلج في المواد هاي يكون اعلى من ال pass

غالبية الجامعات فيها كورسين عادي بالاضافه لكورس الصيفي اذا كان الماستر ب 12 ماده وخذتي مادتين كل كورس وكل سنه خذتي 3 كورسات تخلصين في سنتين

طبعا تشترط شهادة التوفل

امممممممم هذا كل شي عندي .. شدي حيلج وان شاء الله بالتوفيق وخطوه حلوه منج

اتمنى اكون فدتج

الغالية الغوا والزين ماقصرتي ع المعلومات بس خليتيني اتراجع لاني بدرس ع حساب الدوام واخاف اني ما انجح وادفع تكاليف الدراسة —

كنت متحمسةالصراحة بس الحينة شكلي ما بكمل الغالية وشكرا .