(^_^)~رحلة أمورة لليابان – الجزء الثاني~ بعد إعادة تحميل الصور(^_^)

و هنيه قبل لا ندخل بيت محارب الساموراي. كنت واقفة عند كشك
المعلومات (الانفورميشين ديسك) و جان اصور انعكاسي (~_^)

هنيه واحنا نتجول في القرية بين الاثار. تمثال شخص كان له دور مهم في هاغي (نسيت اسمه)

عيبني الانعكاس (تراني احب اركز عالانعكاسات و التفاصيل)

الناس في اليابان مثل أغلب دول شرق آسيا يحبون يركبون السياكل.
هنيه في الاماكن الاثريه حاطين سياكل حق اللي يبا يطوف عالقرية.

عيبني شكل السياكل و هي مصفوفه عدال بعض.

و احنا بين الاثار شفنا هالاولاد لابسين زي تقليدي و يصورون فيديو. قعدنا انشوف
المشهد (طبعا مب فاهمين السيناريو هههههه)

سألنا معلمتهم و خبرتنا ان الاولاد يصورون فيديو تاريخي قصير
كنشاط صفي. ما شاء الله عليهم بروجكتات و هم بعدهم في الابتدائية.
مب مدارسنا النشاط الصفي عبارة عن وسيلة حائط ولا يسوونها عند
خطاط مب من ايد الطالب…. معلمتهم شرحتلنا السيناريو و قعدنا نشوف
المشهد الثاني. بعد ما خلصو الاولاد التصويرصفقنالهم و اتصورنا وياهم. (^_^)

الاولاد كانو يناقشون بعض عن السناريو و زاوية التصوير
و المدرسة تراقب بدون ما تساعدهم. شكلهم كان وايد كيوت
و اتحسون ما شاء الله مبدعين و يعتمدون على نفسهم.

و بعدين رحنا نشوف صناعة الفخار و اللي هو السبب الرئيسي لزيارتنا اهاغي.

رحنا بيت شيبه ياباني متخصص في صناعة الفخار و متوارث المهنة
و الفرن من ابوه و يده. الابو يصنع الفخار و زوجته تتساعده و ولده
و حفيده بعد يصنعون فخار، ما شاء الله 3 اجيال محترفين المهنة.

الشيبه اللي لابس ازرق هو الماستر مال الفخار يحليله (^_^)
هو يشرف على الفرن و درجة حرارته (الفرن تقليدي مب كهربائي)

و هاي زوجته شغلتها تنقي الحصا من التراب و تنضفه عشان يصنعون منها العجنية.

مسكنا الشيَول اللي كانت تغسل فيه التراب و جربناه. كان وايد ثقيل
و احنا يالله يالله رمنا نرفع الخشبة و انزلها. و هي ما شاء الله قوة
و صحه. ما شاء الله عليهم.

و ها ولده العود و هو يشكل الفخار. كان وايد مندمج في الشغل و ما رمس.
عندهم في اليابان الولد العود (الكبير) هو المسئول عن حمل تراث العايلة
و هو اللي يشل الابو والام يوم يكبرون في السن. اتحسون بهم مثلنا في احترامهم للعايلة.

الحفيد كان في المدرسة فما قابلناه.

هاي نماذج من الفخار (بعده ما انصبغ)

و بعدين يحليلهم ضيفونا. شاي ياباني و حلاوة يابانية تقليديه (^_^)
هاي صورتها داخل البيت (مزينيين البيت بالفخار اللي صنعوه على مر السنين)

عقب ما خلصنا الزيارة رحنا نتمشى بين البيوت. شفنا الميكان Mikan (وهي فاكهة مثل الصنطر/اليوسف افندي) بس طعمه احلا بوايد. و كلمة ميكان يستخدمونها بعد للون البتقالي.

و هاي صور متفرقة من القرية و احنا نتمشى (^_^)

عيبني شكل لافتات المحلات و جو المدينة. حسيت عمري في مكان جديم ما ادري ليش. يمكن من لون و ديزاين هاللافته؟

و بعدين سرنا سوقهم الشعبي (المغلق و المكيف) يبيعون فيه السمج والخضرة و الفواكه…الخ. وااااايد كان وناسه الصراحه. طبعاً الناس في هاغي قرويين و صيادين و واااااااااايد طيبين وودودين. مع انه ما يعرفون انجليزي بس تمو يسلمون علينا بالياباني. و انا نقعت كم كلمة و استانسو هههههه. يحبون يسمعون الغرب يرمسون بلغتهم. انا كنت موديه ويايه خريطة العالم و علم الامارات و يلست اشرحلهم بلغتي اليابانية الركيكه ان احنا من الامارات العربية المتحده. (^_^)

هذا (السماج) الصياد كان وايد مستانس و يسولف ويانا و جان اصوره.

كل شي عندهم كيوت مثل ما كررت كمن مره (^,^)
عصير طماط و عصير دراق

وهاي السمجه المنتفخة يسمونها فوغو fugu و وايد عندهم في هاغي و يموتون عليها.

و خلصنا من السوق الشعبي و ركبنا الباص

صورت هاي وانا في الباص حسيت اللقطة كيوت (^_^) شو رايكم؟

بعدين الجو برد و نزل مطر. فتوجهنا للفندق (^_^)
(ما عندي صورة الفندق من برع هاي من النت)

و ها منظر من دريشة حجرتيه مطل عالقرية.

و هااااااااااااااااااي حجرتيه هييييييييييييييي اخيرا جربت النوم في غرفة يابانية (^_^)

احنا يوم دخلنا الحجرة ما كان فيها فراش. حطينا الشنط و نزلنا نتعشى و يوم ردينا الغرف حصلناهم مجهزين الفراش الياباني و مدفينه حقنا (كشخخخه) و الفراش اليياباني يسمونه "فوتون" futon

وهذا هو حمامي *الله يعزكم* بس هذا الشاور. و الحوض (البانيو) حجمة نص حجم البانيو العادي اللي عدنا.
و طريقة اليابانيين في السبوح. اول شي يقعدون عالكرسي الصغير و يتسبحون و يتحججون و يتفركون عدل مدل و بعدين يقعدون في البانيو اللي يكون متروس ماي دافي (أقرب للحار بالنسبة لي ههه) و طبعا الماي الحار يمدد العضلات و يخليها مسترخية. اليابانيين يكررون هالشاور كل ليلة. (يتسبحون يوميا نظاف و يحبون النظافة مثلنا) (^^)
البانيو واااايد صغير الواحد ما يروم يمد ريوله لازم تكون الوضعية مثل القرفصاء.

و بس… نمنا هذاك اليوم و جربنا نمط الحياة الياباني (^_^) و كان من اروع ما يكون.

و بهذا انتهت رحلتنا في هاغي. ما بنسى هالرحلة كانت قصيرة بس وايد روعه و كانت وايد حميميه و اختلطنا مع يابانيين طيبيييين.

اليوم الثاني ركبنا القطار السريع مرة ثانية و توجهنا لمدينة فوكووكا (^_^)

(تكملة الموضوع في الصفحه 9)

اتمنى يعجبكم الجزء الثاني و الثالث في الطريج ان شاء الله