وين اتسوق في ماليزيا

مرحبا الغاليه
انا من اسبوعين راده من ماليزيا
احدث سنتر عندهم اسمه الـPavilion
وايد وايد عود وفيه اغلب الماركات العالميه والماركات الثانيه المعروفه
يعني بتحصلين الغالي والوسط
والحلو انه الماركات القويه مثل قوتشي – اجنر – شوبارد – بولغري – كوتش… إلخ
كل محل منهم ماخذ طابقين
يعني المحل وايد عود
وعندهم سينما في المول
ولاتفوتين الدونات إلي يبيعونه تحت صوب المطاعم بتحصلين الناس عليه طابور
وفي مطعم تركي فوق آخر طابق .. عندهم اكله اسمها دونر لذيييييييذ بين الشورما والكباب

هذا المول بتحصلينه في شارع العرب Bukit bintang بوكت بنتانج
اي تكسي تقوليله هالشارع بيوديج
وهالشارع دومه فيه فعاليات وكافيهات ومطاعم عربيه إلين نص الليل
واغلب الفنادق المعروفه موجوده في هالشارع : الماريوت – الوستن – الرتز كارلتون
وفي مول صغير اسمه Star hill
هالمول شابك في فندق الماريوت وفندق الرتز كارلتون
والمول في نفس الشارع ومجابل الـpavilion وبينهم خطوتين مشي
فيه اغلب الماركات .. قوتشي – فندي – أل في … إلخ
وتحت فيه مطاعم حلوه منها الطربوش لاتفوتينه
انا إلي ما احب الأكل اللبناني حبيته

وعندج مول Suria هذا تابع للبرجين التوأم KLCC
بعد هذا حلووو
وتحت المول تمشين مسافه شوي وبتوصلين للأكواريوم -عالم الأسماك
بعد المكان فنان ويستاهل الزياره

وعندج مولين حذال بعض وحلوين ويشبك من بينهم جسر للمشاه مسكر ومكيّف
يبعدون ربع ساعه عن مركز المدينه
واحد اسمه The Gardens كله ماركات والمول يديد
والثاني اسمه The village mega mall محلات عاديه بس حلو

هذيلا افضل المولات في العاصمه كوالالمبور ذكرتلج اياهم
اتمنى اكون افدتج

وعندج السوق الصيني واحد صغير ويفتح من الصبح والثاني الكبير يفتح من الساعه ثمان المسا بس كاسريهم واحد قالي الشنطه 150 خذتها 40
واي استفسار من عيوني والاخت لولو بحر مكنون ما قصرت