رحلة صلالة تقرير مصور بالتفصيل حياكم

الحمدلله على سلامتج

و في انتظار التقرير

^_^

الجزء الأول

بسم الله الرحمن الرحيم ..

على كثر ما سمعت عن صلالة …بس ما صدقت لين ما شفت بعيني ..
سبحان الخالق خلق فأبدع … جنه الله في أرضه .. طبيعة بكر مثل ما يقولون ..

رحلتنا كانت يوم السبت .. الظهر .. 16/8 2017 ..

الخطوط: طيران الجزيرة

المطار: دبي

سعر التذكره تقريبا 1200 درهم للشخص.

مدة الرحلة: ساعة ونصف

فرق التوقيت: نفس توقيتنا بالضبط

العملة: الريال العماني .. ويعادل عشرة دراهم امارتية او اقل بقليل ..

احنا سبع أشخاص اربع كبار وثلاث صغار …

طبعا وصلنا المطار في وقت مناسب جدا وكانت لنا فرصة اننا نتمشى في السوق الحرة في دبي ..

وما شاء الله السوق كان ضخم وكبير جدا ..

اشترينا بعض الأشياء الخفيفة من الكاكاوات واقلام والوان لليهال ..

ورحنا خلصنا امورنا كلها وقعدنا نتريا الطيارة .. لين ما وصلت ونزلوا منها الركاب ..

ويا دورنا ..

الطيران كان على الجزيرة للطيران ..

الطيارة نوعا ما كانت صغيرة .. لكن الحمد لله مريحه ..

وبالنسبة للوجبات لازم تشترونها على الطيارة ..

وكانت اسعارها غالية .. فيفضل تاخذين خفايف لليهال احسن من المشترى على الطيارة

وبعد الركوب في الطائرة ..

وبعد فترة بسيطة طارت الطيارة ..

وشفنا مشاهد روووعة جدا جدا .. لما الطيارة تدخل في الغيوم … ولما تطير فوق البحر والبر ..

بس احلى شيء لما ندخل في الغيوم مع مطبات جوية خفيفة بسبب كثافة الغيوم ..

ولما وصلنا صلالة شفنا الطبيعة الجبلية من فوق روووعة جدا ..

بس للأسف كاميرتي تعيسة في الزوم ..

والحمد لله وصلنا لصلالة على العصر وخلصنا من المطاار بسرعة ..

وكان في فرق شاسع جدا بين المطارين .. والله يعزج يا بلادي ..

ولما وصلنا هنااااك ..

المطاار كنا مسوين حجز فندق وحجز سيارة ايجار ..

وكانت السيارة واقفة تتريانا .. حطينا اغراضنا في السيارة ..

وكانت فورويل قير عادي بـ 30 ريال عماني في اليوم والليلة .. يعني 300 درهم امارتي ..

وما رجعنا الفندق لا ..

قلنا نستغل الوقت شوي وندور في الخضااااااار والطبيعة العجيبة ..

ورحنا صوب اليبال شوي …

وهذي صور من اول ما وصلنا ..بصراحه كنا منبهرين … من الجمال .. وروعة الطبيعة ..

لأننا كلنا يايين اول مرة ما عدا اخوي دايما يروح ويا الشباب .. بس احنا الحريم اول مرة ..

طبعا في الصورة الضباب كثيف .. وكان في رذاذ والجووو روعة وبارد تقريبا

وكان الجو قريب المغرب ..

يتـــــــــــــــــــــبع ..

بصرااااحه ربيعتي كل سنه تروح صلاله ..
وشفت صور وعيبتني ..^_^

بس بصراحه ما افكر اروح لووول
نتريآآآ التكمله حبيبتي
ونرقب اليديد & المميز

التعديل الأخير تم بواسطة مبدعة النت ; 2008-08-22 الساعة 16:24

التعديل الأخير تم بواسطة مبدعة النت ; 2008-08-22 الساعة 16:06