مجبورة ع الزواج

السلام عليكم

بناات بغيت اخبركم سالفه يوم الخميس كنا معزومين على حفلة ملجة عائلية بس العروس اربيعة اختي الروح بالروح

والله يا بنااات ان ما مداني ادخل القاعه تقريبا دخلت ع الساعه 11 وشي لان كان عندي شغل قلت بسلم ع العروس وبظهر ما بتاخر بس لانها عزمتني وتعرفني وسوالف وياها وجيه

دخلت ع الساعه 11 وشي

سرت عند امي واختي يلست وياهم شوي ويت اختي اتقول فلانه اتقولج تعالي ع الكوشه سرت سلمت ع العروس عاديه كانت بس من قااالوا المعرس بيي العرووس انجلب كل شي فيها تمت مبووزه والله الكل استغرب الناس انصدموا من دخل المعرس وهو مستااانس وفرحاان ويضحك دخلوه اخوانه واخوان العروس انزين من دخل المعرس العروس تمت اتصيح اتخيلوا ما تبا تيلس ع الكوشه وتمت اتصيح وحااظنه اخوهاا وعطت المعرس ظهرها والمعرس مصدووووووم يا ناااس والله كان فرحااان وعقب انصدم ما يعرف شو السالفه اتيمعوا عليها اخوانها خواتها امها يدتها اخر شي قالت ازقروا فلانه يعني اختي اللي هي اربيعتها اتخيلوا سارت لها اختي ع الكوشه وكلمتها وقالت لها طوفي اليوم وباجر يصير خير بس جدام الناس اضحكي وايلسي عدل

اخر شي طلعت العروس مجبورة ع الزواج اخوانها كلهم معرسين وهي الباجيه والله قلبي تقطع ع الريال كيف فرحان ومستانس واخر شي كل انجلب فوق تحت اليوم الثاني كلمت العروس وهديتها قلت لها الريال يبين عليه طيب اتخيلوا بعد كل اللي سوته جدام الناس رد واتصل فيها يبا يعرف شو فيها يعني للحين هو ما فهم مسكين ع نياااته ما اقدرت اكمل ف القاعه قلت حق امي واختي انا بترياكم ف السيارة وطلعت ويلست ف السياره

مب قصدي اقوول والا اخص حد لكن والله انصدمت ان لهالدرجه الاهل يجبرون البنت ع الزواج البنت يتها حاله هستيريه مو مستوعبه حسيت المعرس مظلووم بس الله يهديهم ويوفق بينهم ويسخرهم لبعض ان شاء الله

يا بنات استخيروا ثم استخيروا ثم استخيروا اذا انخطبتوااا

عسى الله يهدي الجميع ويرزق كل بنت بشاب صالح يصونها ويحبها ان شاء الله