زوجي خيرني بين رأيين .!!

السلام عليكم ..

بداية .. من تزوجت وانا وزوجي مشاكلنا ماتخلص .. واغلب هالمشاكل تافهة مثل الطبخ .. والوالدة خبرت اهل زوجي اني ماعرف اطبخ .وام زوجي قالت انا اللي بطبخ وبنتج بتاكل..ماكملت شهر من زواجي الا طاحو فيني ماتطبخي ولا شي .. كنت حامل هذاك اليوم فالشهر الثامن ويابني وعقني ف بيت اهلي قص علي على اساس انه بيداوم .. وخبر امي بالمشكله اني ما اطبخ وما ارفع راسه قدام الناس .. تميت 4 شهور ف بيت اهلي وعقب تدخل واحد من اللاهل واصلح الامور من بيننا والله يسامحهم عقو الغلط كله علي انا.ولا يمعو رايي ومع ذلك سكتت وماتكلمت ورجعت لزوجي ..كنت ساكنه عندهم فالبيت .. ومرت الايام اهل زوجي عمي وعمتي سافرو للعلاج فالخارج .. وزات المشاكل فالبيت لدرجه انه اخوات واخوات زوجييغلطو علي وعلى ابوي وامي وكنت اتهزأ من زوجي واسكت ولما اخبره عن اهله يسكت ومايقول شي .. وعقبها بفترة انتقلت وسكنت ف بيت بروحي .. بس كان ملحق غرفه وصاله وحمام ومطبخ وقلت الحمدلله احسن من لاشيء .. وحملت ويبت الطفل الثاني . وكانت في مشاكل من بيننا بس كنت اسكت عشان ماتكبر المشكله .. والحين انا حامل ف الشهر الخامس وصارت لي مشكله مع زوجي ..اتصل ف ابوي وقال له زوجتي امس ما طبخت وكله تطلب مني فلوس عشان تشتري فساتين للاعراس .. وابوي اتصل فيني وصدمني بالكلام اللي قال له زوجي .. وفي نفس اليوم اتصل ابوي ف ابو زوجي عشان نحل المشكله ولازم الطرفين يكونو حاظرين بس ابو زوجي رفض وقال انا غاسل ايدي منهم .. وعق علي كلام الله يسامحه وفذمته ليوم الدين … يانا ابوي وقال لي شو صاير من بينكم وقات له امس ماطبخت لانه اغراض ناقصتني وماطبخت .. وعن سالفة الفساتين .من تزوجت لهذا اليوم ما طلبت من زوجي فلوس عشان فساتين وكلامه هذا ف ذمته ليوم الدين.. وسكت زوجي وما علق .. قلت لابوي مايعطيني مصروف ومع ذلك اتم ساكته واتسلف من خواتي . وابوي قال له لازم تعطاها مصروف عندها يهال من وين بتصرف عليهم وانت مب موجود .. وسكت زوجي ماقال شي عرف انه غلطان .. وقال له ابوي زوجتك حامل المفروض تراعيها شوي لانها تتعب وجسمها مايساعدها تتحمل كل هالعبء ..واذا ما طبخت اسالها ليش ما طبختي .. ومافيها شي لو طلبتو من المطعم مرة 1 فالشهر.وسكت زوجي وهز راسه بالايجاب .. واهل زوجي قالو لابوي .. بنتك كل ما راح زوجها للدوام راحت بيت اهلها ..ليش ما تيلس ف بيتها .. وانا اصلا اروح يومين وارجع .. والله يشهد علي اني مب مقصرة ف زوجي واهله من طبخ وغيره ..لكن الله فوق والله يسامحهم .. ابوي قال لابو زوجي دام زوجها راضي محد له خص .. وابوي قال لزوجي انته راضي انته زوجتك تيي عندنا البيت .. قال له زوجي نعم راضي قال عيل ليش ابوك مسوي حساسيه فهالموضوع ..سكت زوجي وماتكلم .. وقلت انا لزوجي يوم بتشوف مني قصور تعال وكلمني ماله داعي تدخل الاهل فالسالفه .. صرررخ علي وقال لي مابقول لش وبكيفي .. الحينه انا كيف بتفاهم وياك وكيف بتنحل مشاكلنا اذا انت ما بتقول لي .. يقول لي انا زهقت ومليت .. قلت له طيب انته ليش دوم منعزل وتلعب فالفون سواء فالبيت او عند اهلك .. قال لي انا بكييفي ومالج خص ومحد له خص فيني انا احب العزلة وانا اوسوس ومادري شو.. وقال لي انا اخيرج بين رأيين ..يا اننا تتعدل امورنا او كل واحد يروح ف حال سبيله .. قلت له اوكيه .. وفكرت وصليت واستخرت وقلت له خلاص كل واحد منا يروح فحال سبيله .. قال لي على راحتج .. وباليوم الثاني قال عطينا مهلة شهر قلت له سامحني انا تعبت وماقدر .. مثل ما اخذتني تقدر ترجعني لاهلي .. ورجعني بيت اهلي.. واتصلت فيني ام زوجي وطبعا عقت علي الغلط كله وانا اقول لها زوجي خيرني وانا اخترت هالشي .. قالت انتي عايفتنه من المشاكل معناته انتي ماتبيه وبرايج الله يحفظج وصكرت التلفون .. يعني انا ماعرفت كيف احل هالمشكله .. اهل زوجي ما يساعدونا ف حل مشاكلنا بس يعقو الغلط علي منا والدرب .. الله يسامحهم.. شو الحل الحين .. هم مابيسوو شي بيخلوني جي معلقه لا اني متزوجه ولا اني مطلقه .. انا قلت لامي مابا ارجع لهم كفاني ماجرالي منهم وياني .. وراحو واتصلو ف حرمة اخوي وقالولها خبرينا اي شي يصير عندكم فالبيت اول باول واتصلي فينا .. وصلت فيهم انهم يبو يتجسسو علي شو اقول وشو ما اقول .. خبروني شو الحل ابا اطلق منه..😢

ونسيت اخبركم انه زوجي مبتلي ب شياطين وجن ساكنين فيه وهالشي معرقل حياتي وياه وهو مب راضي يتعالج عند مطوع 😢.. ساعدوني دخيلكم شو الحل ..