يأست من الدنيا و انا بعدني صغيره

السلام عليكم و رحمة الله ..
عندي مشكله .. و متأكده اني بحصل نصايح تنفعني ..

انا عمري 23 و البنيه الوحيده بين اخواني الشباب .. و امايه و ابويه منفصلين .. طبعا امايه لاهيه في اخواني .. تغدو شربو مرتاحين ولا لا .. همها الاول اخواني و همها الثاني الاهتمام بنفسها و ربيعاتها .. اخواني كـ معظم الشباب .. ربعهم و وناستهم هي اولوياتهم .. و ابويه ف عالم ثاني ..

مشكلتي اني افتقد الكلمه الحلوه .. لو امرض محد درابي .. لو اسير و اقول حق امايه اني مريضه ولا فيني شي .. بتقول " شو اسويبج " لكن لو اخويه شي بسيط يعوره .. بتجلب البيت علينا .. انا ما بقارن لأن اغلب الامهات يدلعن الشباب .. بس انا افتقد الاهتمام .. اطلع و ادخل .. امرض اتعب محد يهتم .. امايه 24 ساعه مشغوله ويا ربيعاتها و اهتمامها بنفسها و اخواني .. و لو احاول اتقرب منها واسولف وياها ..ما ترد اتم ساكته .. ييتها بأسلوب حلو .. ييتها بدلع بنات .. ييتها و انا اصيح و اترجاها .. ييتها بكل الاساليب .. ساعات تقول انها ما تحب اسلوبي و شخصيتي .. اذا ما تحبين اسلوبي انتي امايه .. عطيني ملاحظاتج غيريني للأفضل .. بس لا تتجنبيني .. ساعات ادخل حجرتها و احاول اضحك تروغني من حجرتها .. بس تستخدمني كأداة للفخر جدام الناس .. بنتي درست و تخصصها قوي و و و و تشتغل مدح و دلع جدام الناس بس .. و من ورى الناس شي ثاني .. و اخواني همهم ربعهم و وناستهم .. لو اطلب منهم شي بيقولون عندج سيارتج و سوي الي تبينه ..

لو امر بمشكله .. لو احتاي اتخذ قرار ما عندي حد اشاوره .. لا ام ولا اخوان ولاابو .. اتمنى لو كانت عندي ام تناقش و تسأل .. لو اقولها شي يعورني تحاتيني .. بس للأسف ..و لا اخو يفكر ان هاي البنيه لا امايه تدري عنها ولا ابويه .. ع الاقل حد ياخذ بخاطري ..
والله احس اني يتيمه .. من ادخل بيتنا اتم ف الحجره بروحي .. اضحك و اصيح و اشتكي لنفسي .. ساعات احس بتيني حاله نفسيه .. حتى شخصيتي تغيرت اظهر من البيت اتمنى اسمع دعوه حلوه .. ساعات اسوق السياره و انا منهاره .. ابليس يوزني اسرع و ادعم و اقول لو امرض ولا اتكسر بس افقد الوعي و ارتاح .. لو ادخل فـ غيبوبه ولا اموت .. المهم ما اتم عايشه جي ..
ترى جدا صعب الواحد يعيش و محد حوله.. يوم احس عندي مشكله ادخل الجات و ايلس اسولف و ادور حلول من الناس و اتناقش وياهم .. بس لين متى بدور ناس غرب ..
بنات خالتيه و بنات عمي فرق السن بيني و بينهن حاط حواجز بينا .. و ربيعاتي بس وقت الحايه ولا شي يخص الدراسه .. هالزمن محد لـ حد .. نادر تحصلين صديقه و يكون قلبها على قلبج ..

اعرف هالمنتدى فيه حريم و يمكن عمارهن من اعمار امايه .. و فيه بنات اكبر عني و من عمري .. فـ اتمنى تشورن عليه .. ولا تعطوني حلول تقوي شخصيتي و تخليني اتعود على الوضع ..و اقل شي دعوه في ظهر الغيب ..