ولدي والاندومي ابغي وصفات دخيلكم

هلا اختي
بصراحه الله يعينج عليه شكله ولدج مينون اندومي
انزين أنا عندي وصفه للإندومي أحب أسويها بدل ما يكون الاندومي بروحه
اممممم
اسلقي الاندومي و قدر بروحه و بدون ما تحطين البهارات لا تخلينه يستوي وااااايد يعني حده ينبلع
و اطبخي بيضتين بس خليه مفتفت يعني مو قرص كامل
و في قدر ثاني حطي ثوم مقطع شرائح( وحده تكفي ) و حطي فلفل إذا تبنه حاره و بصل أخضر و بعدين ظيفي الخضار الي تبينها أنا أحط فلفل رومي شرائح و جزر و مرااات أكواز الذره و بعد ما يستوون ظيفيلهم البيض و خس و لا تخلينه يطول لأن الخس يستوي بسرعه امممم و آخر شي حطي الاندومي طبعا بدون الماي و حطي البهارات
و بالعااافيه

يم يم.. ذكرتيني بطبختي العبيطه ههههههه >> بس صدق طلعت يم يم

كنت يوعااانه وفخاطري باستا >>> بس الاخت مب مال طبخ

المهم سرت المطبخ وفورت الاندومي فالماي ببهاراته >>> يعني مثل ماتطبخين الاندومي العادي

بس ماحطيت فيه الدهن النباتي اللي يكون بكيس صغير

حطيته في طاسه وخلطت داقوس وياه..

وبعدين قطعت عليه جبنة مثلثات.. ورشيت عليه موزاريلا مبشور >> جبنة البيتزا

ودخلته المايكروويف عشان يذوب الجبن.. ممممم صدق صدق لذيييييييذ

جربيه لولدج وان شاءالله يعيبه.. واذا تبين حطي وياه نقانق (لذيييذ) وووو فطر بس أنا مايعيبني الفطر..

اختج مدمنة اندومي
————————-

وصفاتي
1

2 علبة اندومي اسلقهم بدون البهارات واصفيهم قبل ما يستوون

في الجدر حطي زيت زيتون +بصل اخضر+ملفوف (احمر او اخضر) + حبتين نقانق مقطعة شرايح او دوائر
حطي عليهم بهارات الاندومي + ملعقتين صويا صوص
لما يستوي النقانق والخلطة حطي الاندومي واخلطيه يممممممممممممي
————————————————-
2
علبة اندومي كاااااري اسلقيها مع بهاراتها + ملعقة صغيرة فلفل احمر
وبعد ما تستوي صفيها من الماي
وحطي عليها وهي حارة ملعقة جبن كرافت واخلطيه
————————————————–
3
صدر ديايه مسلوق قطعيه صغار وحطيه مع بصل اخضر وملفوف وصلصه طماط وبهارات الاندومي وفلفل
اسلقي 2 اندومي بس نص سلق وصفيه وحطيه على الخلطة بيصير شرات المعكرونه
————————————————-
4
بيضه مسلوق + جرجير+ نقانق مسلوق + اندومي

اختاري اندومي المقلي اللي لونه ابيض وحطيه في الماي_الماي يكون قليل على النار وحطي عليه النقانق المقطع +الجرجير + بهاراته والصوص ماله
قشري البيضة وحطيها بكبرها وياهم ولما تاكلون الاندومي قطعو البيضة واكلوها وياه
—————————————————
5

اذا يحب الحار
اندومي كاري + ملعقة داقوس +ملعقة صوص + بصل اخضر وشوية ماي وبهارات الاندومي

————————————————–
6
جيس شوربة ماجي شعيرية حطيها في الماي عادي وقبل ما تستوي الشعيرية شوي حطي اندومي عليها بدون البهارات لان الشوربا اصلا سولتي بس زيدي عليهم فلفل احمر وملعقة قشطة

جربي وخبريني