نصائحكم للرضاعة الطبيعية

كلام Best_A صحيح
حاولي ترضعينه كل ساعتين في فترة الأربعين صح بكون شوية تعب عليج بس لام عشان تحفزين صدرج يفرز حليب أكثر، ولا تحاولين تعطينه صناعي ، أنا في عيالي كنت بس أعطيهم حليب طبيعي حتى الماي ما كنت أعطيه لهم وكانوا أهلي يحتشرون علي بس كنت أطنشهم لأني قريت إن هالشي عادي والحليب الطبيعي وايد فيه ماي يعني الياهل ما يحتاي له ، في حريم يتعذرون بخصوص حلمة الثدي تكون داخل وصعب الياهل يطلعها ، الحين في الصيدليات بتحصلين أداة تحطينها على الثدي واتساعد الحلمة تطلع لبرع.
طبيعي الياهل بينزل وزنه أول أسبوع فلا تحاتين بزيد بوزنه بالتدريج إن شاء الله
عن تجربة شخصية وما راح أكذب عليج الرضاعة الطبيعية تحمي طفلج من الأمراض وخاصة حساسية الصدر، راح تسوي لج مانع حمل طبيعي إذا استمريتي عليها وتنحف جسمج يعني ما يهمج كلام الناس اللي بتيج تقولج حرام خليه يرضع صناعي يمكن ما يكون شبعان وإلا رضعيه صناعي بالليل عشان يتم راقد فترة أطول ترا انتي اللي بتتعبين وياه بعدين.
قبل أهلنا لا عندهم صناعي ولا أشياء مساعدة والحمدلله اعتمدوا على الطبيعي وصحتهم ما شاء الله ما عليها كلام وشوفي الحين الكل اعتمد على الصناعي وبدت تطلع لنا أمراض يديدة.
إن شاء الله استفدتي بعد هالمحاضرة خخخخخ
الله يحفظ لج ولدج ويجعله قرة عين لج ويوفقج في تربيته.

تسلمون خواتي عالنصايح في ميزان حسناتكم ان شاءالله

ماقصرتوا

بانتظار باقي التجارب

السلام عليكم

الرضاعه الطبيعيه يبالها صبر لانها صدق تستاهل قارني بين مناعة طفل رضع طبيعي وثاني تلقين اللي راضع صناعي كله مريض ومستشفيات وماشي مناعه … وفايدتها مثل ما قالوا البنات تضعفج بسرعه وترجع الرحم بسرعه مكانه وتساعد في حرق دهون الحمل … هذا كلام طبي صحيح ١٠٠ ..والطفل اللي يرضع طبيعي نفسيته تكون سليمة يوم يكبر بعد هذي دراسه..

اول ٣ ايام ينزل منج اللبا وهذا مفيد جدا لصحه الطفل لازم ياخذه وهو بيكون صعب عليه المص بس حطيه ع صدرج خليه يتعلم .. واستحملي متى ما صاح حطيه يرضع… وبعد 4 ايام بينزل الحليب… كميه الحليب تزيد كل ماشرب الطفل زادت الكميه… خليه ربع ساعه على الطرف اليمين وربع ساعه ع الطرف اليسار… اول اسبوعين ماله وقت متى مايريد عطيه وبعدين خلاص كل ساعتين وبيكبر وبيكون كل اربع ساعات … ووقت ما تلقين ان فيج حليب واايد اشفطي وخزني بتستفيدين منه يوم بتروحين مكان او يوم ترقدين خلي حد يرضعه بالمرضعه …

بعد ما يخلص رضاعه ادهني صدرج بمرهم الترطيب عشان ما يتشقق وخلال الحمل دايما ادهنيه وسويله مساج..

كثري من شرب السوايل الماي العصير والسلطات والشوربه هذا كله يساعد على تكون الحليب واكيد المشروبات الدافيه اليانسون والحلبه اول 10 ايام ….

معلومه: مع كل مصه الله يغفر لج ذنب ويعطيج حسبه فحتسبي الاجر…