موسوعة السياحه في تركيا

رجعتلكم

المولات في اسطنبول وايد ونصيحتي لكم اول ماتوصلون مطار تركيا على طووووول شلوا البروشورات، انا جيه سويت، خذت بروشور المولات وبروشور خريطة اسطنبول وخط المترو, ويوم وصلت الفندق يلسنا وطالعنا الخريطه وبما انه كنا ساكنين في مرمره مجابل محطة المترو قلنا بنستخدم المترو لانه التكاسي وايد قصبونا
في السفره الاولى, وكل مره كنا نختار مول غير ونتبع الخط ماله ونسير المترو حسب الخط اللي نباه ولاخساير ولاغيره ومتعه اكثر بصراحه بس اللي عندهم يهال ماانصحهم موووول بالمترو لانه تعذيب صعده ونزله ودري متحرك خصوصا اللي عيالهم صغار ويستخدمون ترولي وايد بيتعذبون، بالنسبه لاسامي المولات بذكر اللي ايي فبالي حاليا والباقي بدوره عقب وبحطه فالموضوع.

مول استيني بارك اكبر مول في اسطنبول واحلى مول وفيها ماركات عالميه ويلسات وكوفيات مجابله البوتيكات من غير اللي داخل, المول فعلا يستاهل الزياره، اذا بتسيروله عن طريق التكسي بياخذ عليكم وايد.

مول اوليفيم، مول صغيرون زين فيه محلات اسعارها معقوله اكثر وفيه مكان لليهال يلعبون وفيه مطعم وايد حلو فوق ماعرف اسمه بس بتشوفون فيه عيايز تركيات يخبزن.

مول جواهر مول كبير وحلو وفيه وايد محلات حلوه وألعاب للكبار والصغار وساعات يسوون فعاليات فالساحه اللي برا مجابله البوابه الرئيسيه للمول وشي كوفيات هناك اذا حبيتوا تيلسون.

مول غاليري او غاليريا شي جيه، ماحبيته صغير ومافيه شي يرزى ان الواحد يتعنى ويسيرله، يعني مضيعة وقت بصراحه .

السوق المصري اعتقد اللي عدال الجامع، مب المكان اللي وين البهارات لا، كملوا مشي بتحصلون عماركم دخلتوا في تخشيشات شرات المحلات الشعبيه، عباره عن خناخيش وايد حبيتها فيها اشياء حلوه خصوصا اللي تأثث وتدور شي سعره معقول (اقصد المواعين طبعا ).

المطاعم

ببدا بالفاست فود

كنتاكي لالالا

بيتزاهت لالالا

مكدونالز اوكي وانصحكم تجربون الميلك شيك عندهم وخصوصا الستروبري يمييييي

اما المطاعم التركيه فهي واااااااايد ماشاءالله والواحد يحتار بس في مطعم كنا نحب نسيرله ونيلس فيه اسمه اوز اورفا مكان في التقسيم في السيد اللي فيه مكدونالز اللي عدال المترو المقابل لفندق مرمره، جربت الشيش والبيتزا تجنن والكنافه روووعه واللحم بالعجين والشاي طبعا لاتخلوا اليلسه من الشاي التركي بس فيه عيب ان اليلسه مطله عالشارع والشحاتين يخربون اليلسه عادي تلقين شحاته صغيره عافده فويهج تطلب
وانصحكم في كل مطعم تشيكون حسابكم عدل لان بعضهم يستهبلون خص هذا المطعم.

في مطعم يسوي سمج في الشارع المقابل للمطعم اللي خبرتكم عنه توني ماعرف اسمه بس بتشوفونه عارض السمج برا ويخليكم تختارون السمج اللي تبونه ويطلعه لكم ويسويه فرش واكله فعلا لذيذ, المطعم في بداية المدخل المؤدي لمجمع فنادق داخل للي يبون فنادق اسعاره شويه اقل عن مرمره والانتر وجراند والهيلتون وووو.

اللي يحبون الجيز كرواسون والفرش اورنج جوس ع الصبح انصحكم بالكوفي اللي تحت مرمره تماما قبل ستاربكس، فيه يلسه داخل وبرا والكرواسون عنده وايد حلوووو.

لي عوده

اللهم اهدني
وسددني، اللهم إني أسألك الهدى والسداد
بالتوفيق ان شاء الله جزاج الله خير على المعلومات

التعديل الأخير تم بواسطة A.Aln3aimi ; 2012-01-29 الساعة 04:19

تكمله…

بالنسبه للمولات في طرابزون زرت اكبر مول عندهم اسمه فورم، وايد حبيته، فيه محلات حلوه ومطاعم وايد حلوه انصحكم بهذا المول، وسرت مكان ثاني ما اذكر اسمه بس كان مثل مكان مرتفع شوي وشي مثل الحديقه فالنص و دور مادار مطاعم ومحلات شنط مقلده وملابس و و و و، بالنسبه للمطاعم جربنا مطعم يسوي شاورما كان على زاويه، فاشل جدا، والمنطقه ماتصلح فالليل لان السكارى عزكم الله يبدون يطلعون، بس طرابزون بشكل عام تستحق الزياره اذا كنتوا ناوين تسيرون اوزنغول، واهمممم شي انكم تستأجرون سياره لانها واااااايد بتنفكم وبتستكشفون مناطق وايد بساهم شي ماتنسون الخريطه او جهاز الجي بي اس.