مواعدين فالشارع جدام الخلق !!!

السلام عليكم ورحمة الله وبركاته ..

اليوم وانا اتصفح فالمنتدى شفت موضوع شد انتباهي و حبيت اناقشه بس بطريقة ثانية ..

وحدة كاتبة موضوع عن ثنين كانوا مواعدين جدام العمارة ومواطنين ومن هالكلام وما سوت شي ..

نحن مب منزلين مواضيع عشان فلانه تقول انا شفت هذيج المرة فالباركنات و شفت هذاك اليوم فالموول .. الخ

نحن مب هامنا نفضحهم "ولو انه دواهم" كثر ما هامنا سمعة بلادنا وعيالنا

تعالوا قبل 15 سنة كانت موجودة هالسوالف؟؟

لا طبعا ..

الحين تعالي شوفي بنات اليوم ..

1- ترمس شباب … 2-بويه … 3- تحب بس بويات

والاقليه هم اللي سلموا من هاي الدوامه

خبروني بس كيف تبون الشباب يتزوجون وهم يشوفون هالبلاوي جدام عينهم؟؟

الواحد يبا وحده تكون ام عياله .. مب يتزوجها وينصدم فيها اخر شي !!

وهذا اكبر سبب لزيادة نسبة العوانس

في وحدة الله يستر عليها في احدى الجامعات اللي فيها سكن معرووفه طبعا بين البنات فالسكن

متزوجه وعندها عيال لكنها بويه ! .. وترقد مع بنات !!

يسألونها ليش تسوين جي؟ .. يعني انتي عندج ريل !

تقول والله ريلي مب موجود فالسكن شو اسوي؟ .. اقزر حالي ويا البنات !

والله الوحده يوم تسمع هالسوالف يقشعر بدنها !! .. معقولة وصلنا لهالانحطاط؟

والله انه الاجانب ما يسوون جي ! يور عافانا الله

شو الحل لهالموضوع .. ولين متى بنتم ساكتين؟

طبعا اول شي يخطر ببالكم .. "بنبلغ عليهم الشرطة"

وشو بتسوون يوم يقولكم الشرطي ما عندي الصلاحيه؟؟؟؟

الشرطي لو شاف سيارة واقفه في مكان مشبووه .. و لو كان شاك انه حد مواعد فيها

ما يقدر يفتح الباب عليهم .. ما يقدر يوايج داخل من الدريشه

لانه على قولتهم " السيارة مكان خاص وتعتبر كانه بيت والواحد يروم ياخذ راحته دام انه محد انزعج منه"

لو الشرطي عنده ضمير . بيبلغ الجهه المختصه و بتي الشرطة النسائيه وبتتدخل حزتها ..

لكن لو شرطي فتح عليهم الباب او انه سوالهم شي .. يقدر راعي السيارة يبلغ على الشرطي ويرفع عليه قضية !!

طبعا انا مش يايبه كلام من عندي .. كلام من الشرطه بنفسهم

يعني بعد ما تسمعون كل ها؟ … دام انه الشرطه مخلتنهم على راحتهم؟

شو بايدنا نسوي؟ .. نسير نضربهم يعني ولا كيف؟

ادري طولت عليكم .. بس شو اسوي من القهر اللي فيني !!

اخر شي احب اضيفه .. عضوة كتبت رد في موضوع وحبيت احطه هني:

و طالما ان الفنادق و خاصة ال 5 نجوم اللي كانت تستقبل هالاشكال صارت ترفض تواجدهم مو لانه ضمائر الفنادق صحت لا لانه هناك مشاكل عديدة صارت لمواطنين داخل هالفنادق و طبعا الكل متستر عليها و القية يضع راسه في الرمل كالنعام

فاصبحت الفنادق تطلب الهوية و عقد الزواج ففي نظركم وين يروح هالبلاء اكيد للشوارع و السياارات لمخفية و الاماكن الي لا تخطر لدوريات الشرطة على بال

حليلها والله شكلها على نياتها وما تدري باللي حاصل !!

من متى الفنادق تطلب عقد زواج !! .. الله المستعان بس لو بنرمس عن الفنادق ما بنخلص

الفنادق همها الفلوس وبس !!!! .. انا كم مرة رايحه مع اخوي فنادق في دبي بسبب بعض المؤتمرات اللي لازم احضرها ..

وما يطلبون منا شي ابدا .. يعني مسهلين على الناس درب الانحراف !!

الله كريم بس ..

وانتظر آرائكم …