منو عيالها في كجى 2 وصف اول بمدرسة الشويفات

هلا والله الغالية
منهج الرياضيات لكي جي 2 فيه جمع و طرح, و بنهاية الفصل هذا راح يوصلون لحد رقم عشرين. لكن طبعا يعرفون يعدون من واحد لي 100.
و بالنسبة لكتابة الرقم ما عندهم لكن يوصلون ما بين الرقم و الكتابه مالته بحكم انهم يعرفون يقرون . يعني ممكن يحطون لهم قائمتين و فيها اللأرقام بالعدد و الثائمه الثانية الأرقام بالحوف, و يوصلون بين كل رقم والكتابة مالته.

العلوم ما عندهم كتاب خاص فيها, لكن عندهم كتاب فيه مجموعه من الدروس المختلفه و التمرينات. و بالكتاب نفسه فيه دروس عن جسم الانسان و الحواس الخمس و الحيوانات البريه و الأليفه.

العربي ماخذين الحروف كلها في جي جي 1 و الحين مراجعه لها و مع كلمات زياده و قراءه. و عندهم بعد الأرقام و الأشكال الهندسيه و الألوان.

الانجليزي قلت لج عندهم كتاب فيه مجموعه من الدروس و التمرينات, و عندهم 3 كتب للقراءه غير القصص اللي تتبدل مرتين كل اسبوع, اهمه الحين واصلين Level 2 في القراءه. لازم يعرفون يقرون اغلب كلمات القصص او على الأقل يركبون الحروف مع بعض لين يوصلون للكلمه.
و الكتابه عندهم كتاب للتدريب على الكتابه و يخلونهم يكتبون جمل نسخ.
و يعرفون يكتبون كلمات بسيطه عن غيب مثل
Up
Down
Yes
No
و غيرها شغلات بسيطه لأنها ممكن تكون اجابات لأسئله في كتاب التمرينات.

و اذا حابة تعرفين شنو اهو Level 2 ممكن تروحين مكتبة المجرودي اللي في دبي, او اي مكتبه تكون زينه, و شوفي الكتب و القصص الانجليزيه مالة Level 2

اي مساعده ثانيه انا بالخدمه و حياج الله