مدرسة ابوظبي الاسترالية

مدارس ابو ظبي

1- مدرسة الاتحاد الوطنية
ممتازه,في خليفه أ ملك للدكتور عيسى السويدي و لها برنامج صباحي للصغار لقراءة القرآن و حفظه و يعطون الطلبه وقت للصلاة. يعني انها مدرسه تهتم بالعربي و الدين و الانجليزي. ام واحده فقط قالت انه سمعتهم اقل من واقعهم, و انها ما شافت شي من برنامج حفظ القرآن مو ذاك الاهتمام فيه. لكن بنفس الوقت امدحت الاداره و قدرتها على احتواء اي مشكله تصير." 8 اصوات"
و هذا الموقع مالهاhttp://www.alittihad-ad.com/ittihad%20sch.htm

2- مدرسة الشويفات الدولية
ممتازه, عيبها الوحيد كما قيل انه العربي عندهم ضعيف اهو و الدين لكن الباجي من اروع ما يكون. "8 أصوات". موقع المدرسه http://www.iscad-sabis.net:88/ad/main.jsp

3- مدرسة الامارات الوطنية
صوت واحد ضدهاوالسبب انهم ما يرجعون كتب او اي شي مع الطالب يعني الأم ما تعرف شي عنه. و الصوت الثاني اللي ضدها قال انها من سيئ لأسوأ. بالمقابل 3 أصوات مع مدح المدرسه و قالوا عنها فيها اهتمام باللغه العربية و الدين.

4- مدرسة النهظه الوطنية
صوتين اشتكوا, واحد منهم من كثر الطلبات و انهم وايد و سخيفه و انه وقت الطالب يروح في تلبية الطلبات . لكن بنفس الوقت الصوت هذا مدح كثر الأنشطه في الصفوف و انه التحفيظ القرآني للطبه ممتاز و يكون عندهم كم كبير من المفردات و المعلومات العلمية و الشرح ممتاز.
بالمقابل 5 اصوات مع المدرسه و واحد منهم قال انه الطلبات بسيطه و متوفره في كل بيت.و الأنشطه روعه. و فيها يفصلون بين البنات و الصبيان.

5- مدرسة خديجه الكبرى
مدرسة حكومية قوية جدا و ماسكة المدرسه شركة كنديه. " صوتين فقط."

6- مدرسة ABCهي عباره عن فيلا لكنها ممتازه في الانجليزي يمكن مثل الشويفات. و مهتمين بالعربي و الدين لكن هي من كي جي 1 الى الصف السادس فقط.. و 6 اصوات معها, و صوت ضدها.

7- المدرسة الأمريكية
في شارع المطار, صوت ضدها على اساس انه اختلاط الطلبه بالمعالمات بزود و ماصخ. و صوت يمدح المدرسه.

8- انترناشيونال كميونتي سكول
صوت واحد فقط و قال انه التأسيس عندهم في كي جي 1 ممتاز جدا.

9- مدرسة الربيع
صوت معاها و صوت ضدها.

10- مدرسة ابو ظبي الدولية
فيلا في مشرف, و الدراسه قويه جدا كما قالت احدى الأمهات, و لكن موقع المدرسه خطر جداا. " صوت واحد فقط"

11- مدرسة الخبيرات البريطانية
قالت احدى الأمهات انها الأولى في الترتيب على مدارس ابو ظبي واللي بعدها الشويفات. لكن كان ها صوت واحد فقط.

12- مدرسة بن حمودة النموذجية
صوت واحد فقط

13- المدرسه الامريكيه ابوظبي
مطبقه برنامج البكالوريا ادولي ممتاااز جدا يخلي الطفل يبدع ويطلع طاقاته التعليمية. كل شهر عندهم موضوع لازم يبحث عنه مش بس في الكتب عن طريق انت والقصص والمجلات واخر شي اطفل يقدم برزنتيشن عن اللي سواه وهذا يبني شخصيه الطفل انه يوقف ويتحدث امام الناس. المدرسين يكونون مع اطلاب متداخلين يعني ما في رهبه من دخول المدرس اصف ولا عقد بس الاحتراااام موجود وبنسبه للمدرسات العربي مش مقصرات لازم قراءه قصص عربيه غير منهجيه "خارجيه" وترى مدرسه كامله في العالم مش موجوده لازم في عيوب كلن ورايه والاهل عليهم دور كبير بعد ……………………

14- مدرسة الشهب الخاصه
صوت واحد فقط

15- أكاديمية زايد
صوتين للمدرسه, قالت عنها احدى الأمهات: " اللي مابتحط بنتها في مدرسة(اكادمية زايد) بتندم,هناك يخلون البنات يبدعون … ويسوولهم أشياء حلوه ,وبعد دراستهم قويه …وبيسهل عليها يوم بتدخل الجامعه"

16- المدرسة العلمية الدولية
صوت واحد فقط. و هي رائعه من ناحية المنهج و التدريس والمعامله و الأنشطه. و منهجها بريطاني. عندهم اهتمام بالعربي و الدين. عيبها الوحيدانه المبنى شرات الفلل.

17- مدرسة البشائر الخاصه
في مصفح, رائعه و تعليمها قوي مع التركيزعلى القرآن والدين و الأدعية. صوت واحد فقط.

18- مدرسة الابداع العلمي
في خليفه, لم يمدحها احد يعني ابتعدوا عنها, وايد اهمال و تسيب و لا يوجد اهتمام بالأطفال في حالة الاصابه. و هي ليست فرع من مدرسة الابداع العلمي اللي في الشارقه.

19- مدرسة الورود

ما مدحها احد, قيل انه بعد ان تغيرت المديره اصبحت تسيب ولا فيها اي نشاط لجذب الطفل للمدرسه. و هي مدرسة تجارية.

20- حضانة First Steps
صوت واحد, قالت عنها احدى الأمهات: " والصرااحة وااايد مرتاحو معاهم سواء من حيث ادارتهم او من حيث التعامل اما من ناحية تعليمهم له ومع انه في الحضانة وعمره الحين 3 سنوات الا انه يعرف اشياء وايدة مثل الاحرف والالوان والاعداد والاشكال ….."

21- مدرسة أبو ظبي الأسترالية

قيل عنها" هب مدرسة هاي اكاديمية واللي تنافس في قوتها اعتى مدارس استراليا .مديرتها اعتنقت الاسلام قريب انسانه خلوقه ومتفهمة.اسعارهم غاليه لكن منهجهم قوي
واللي يتخرج منها كل جامعات العالم سواء في استراليا او خارجها ترحب فيه وتقبله
عندهم اسلوب حلو في التدريس وعنده في كل اسبوع عمل تطوعي
الصلاة اجباريه في المدرسة ومادة الدراسات الاسلامية بعد
ويعتمدون على نظام التحفيز وحث الطالب على الابداع والمشاركة وليس الحشو والتلقين
هذا اللي اعرفه من تجربه ناس دخلوا عيالهم وناس ثانيين السنة سجلوا عيالهم فيها"