ماجستير إدارة الأعمال

ساعدوني بنات

اختي نسختلج الموضوع اللي أنا كتبته عن جامعة حمدان لانه أظن انحذف او شي جيه

.
.
.

بخبركم اول شي شوي عني
انا حاليا عمري 24 .. تخرجت دبلوم عالي من كلية التقنية ف دبي بتخصص صيدلة ف سنة 2008
و على آخرها توظفت ف دايرة الصحة و كملت بكالريوس و تخرجت من البكالريوس ع سنة 1 – 2011
هاي ايام كنا لازم ف التقنية نوقف فترة معينة بسبب قلة الكلاسات و المعلمين
المهم.. قبل ما اتخرج دورت وايد وايد وايد ع جامعات

داخل و خارج الدولة.. عشان اكمل ماجستير ف تخصص غير تخصصي
و سالت وايد و اتصلت وايد و راكضت وايد
لين ما قررت بعد الاستخارة انه اقدم اوراقي ف جامعة حمدان
و الصراحة ف البداية وايد كانت شي صعوبات

لاني الإفادة ما كانت طالعة من التقنية
و ما كانوا بيقبلوني هناك بدون الافادة و انا ما كنت ابا اوقف فترة و ارد اكمل
فسرت خذت رسالة من الكلية انه انا مخلصة
و الحمد الله قبلوها بشرط اني اييب الافادة عقب

دشيت بتخصص Organizational Excellence بس عقبها غيرته
و كان هذا ف بداية السمستر لاني حسيت عمري اقرب لتخصص ال Innovation And Change Management
و اثنيناتهم يكملون بعض.. يعني تابع للجودة و غيرها
بس بعد الاستخارة دشيت هالتخصص

المهم.. اول ما دشيت دخلوني الMAP
و هو عبارة عن برنامج تاخذين فيه 7 مواد و كلها عبارة عن اشيا تخص البزنس
و كل اسبوع تاخذين مادة و يكون فيها بروجكت او اساينمنت ع حسب الاستاذ
و هالبرنامج يكون للي تخصصهم مب بزنس ف الاصل (مثلا صيدلة .. هندسة .. آي تي .. و غيرها)

صراحة هالبرنامج ضغط واااااايد و تحسين عمرج بتموتين (بدون مصخرة)
و كنت احس إني خلاص ابا اوقف
بس اهم شي الاصرار و العزيمة = )
و خلصت هالبرنامج و بديت بتخصصي ف شهر 2 – 2017

خذت اول سمستر 3 مواد و الاحسن تمشين ع الستدي بلان بالنسبة للمواد
لانه شي مواد عسب تاخذينها تعتمد ع مواد ثانية لازم تكونين مخلصتنها
فامشي ع الستدي بلان وايد احس الا لو ما كان عندج اوبشن ثاني
المهم.. خذت 3 مواد و الحمد الله خلصتهم على خير

و الاساتذة طيبين معظمهم و بيساعدونج ف سالفة الحضور
بس يكون غياب لعذر! يعني انا دوامي شفتات و شي كذا شخص كان عندهم سوالف دوام
مب بس تغيبين لمجرد الغياب!
و غير جيه يحبون يفهمونج

انا ارمس عن اساتذة تخصصي و ماقدر احكم ع حد ثاني
و الكلاسات بين الفيرجوال (اون لاين) و بين الفيزيكال
و الفيرجوال يعني لازم تاخذينلج مايك و ترمسين الاستاذ و الطلاب فيه
وقت النقاش و غيره

و خلص السمستر على خير و مشينا و ظهرت النتايج و خذت صيفي مادتين بما انه الصيفي 5 اسابيع!
الحمد الله.. الله وفقني ف اختياري و خذت مادتين و الاستاذين كانوا طيبين واااايد
صح المدة قصيرة بس هم وايد ساعدونا
مع انه اللي كنت وياهم كانوا ماخذين مواد ثانية و الاساتذة خبلوهم

و الحمد الله احينه سجلت حق السمستر الثالث و نزلت المواد
و باذن الله لو مشا كل شي بيكون تخرجي شهر 6 – 2012
اللي عندها اي سؤال تسالني
انا ماعرف عن باجي التخصصات فبليز لا تسالوني

بالنسبة للاسعار.. كل شي مكتوب ف الموقع
و طبعا الاسعار تختلف من الماجستير للبكالريوس
و كل شي موضح ف الموقع
و بالنسبة للاوراق كل شي ف الموقع بعد

لازم تكون عندج الافادة و الايلتس و 2 ريكومنديشن ليترز و صور شخصية .. اظن هذا بس
و نظرتي العامة للجامعة.. الصراحة ماشي شراتها
انا سرت جامعات شرات الكندية و غيرها و موووووول ما ارتحت
مع اني دفعت مال التسجيل عندهم بس جيه ما ارتحت

و حبيت الجامعة لانه اللي ويايه مواطنين و هذا اهم شي
ماحب ادرس مع جنسيات ثانية (مع كل احترامي لهم)
افضل المواطنين حتى ف طريقة التعامل
و الشغل كجروب و غيره

الجامعة اعطيها 10 / 10
من ناحية كل شي.. قبل كان المكان صغير و الحمد الله نقلونا مكان ثاني و مبنى منفصل
و مافي شي اسمه احفظي.. حتى الامتحانات.. كله من فهمج (ارمس بالنسبة للماستر)
و كل شي ثاني الحمد الله عال العال

بليز لو فيه اي استفسار حطوا ع العام
لانه الخاص عندي فل من الاستفسارات عسب كذا موضوع
و كل اللي اباه منكم دعوة حلوة = )
و الله ايسر اموركم

و شي اخير.. لا تخلين اي شي يوقفج عن شي انتي تبينه!
يعني خلي عزيمتج قوية إذا صدق تبين هالشي
شو من مطبات بتواجهج تخطيها و امشي
لا توقفين ع شي واحد!