طريقة عمل السينابون

جربي طريقة ام ماايد … انا مجربتنها وعجيييييبه بصراحه ..

المشاركة الأصلية كتبت بواسطة ام مـ2003ـايد

اختي بعطيج طريقه بس تنفذيها بحذاااااااااافيرها لان كل كلمه مهمه جداااااا والتطبيق الصح بيعطيج نتيجه صح غير كذا بيطلع عندج عجينه مب نافشه

٤ صفارات بيض على حرارة الغرفة + بيضة كاملة بعد على حرارة الغرفة يعني ضرووووري طلعيها قبل ساعتين عسبت تدفأ

١/٤ كوب سكر

٦ ملاعقة كبيرة زبدة ذائبة

١٧٠ جرام لبن ، تقريبا ٣/٤ كوب

٤ أكواب طحين أبيض

ملعقتين وربع خميرة

ملعقة ونص ملح

زيت للدهن

أول شي أخلطي اللبن + الزبدة + البيض كله + السكر إلين ينخلط زين . بعدين أضيفي كوبين من الطحين + الخميرة و الملح .

الحين بخطاف الخبز لو عندج جهاز أو بالبيد ولو إنه شوي متعب أخلطي ، كل الطحين ما عدا ٣/٤ كوب تقريبا يعني بقي شوي يمكن تحتاجينه ويمكن لأ . أخلطي يمكن ٥ دقايق ، المفروض تكون العجينة طرية وما تلصق بإيدج لو لقيتيها تلصق زيدي شوي طحين و كملي خلط إلين توصل المرحلة إنها ما تلصق . الحين إعجنيها باليد أو بالعجانة حوالي ٥ دقايق بدون أي طحين زيادة
الحين حطيها في صحن مدهون بزيت وخليها تتخمر إلين يتضاعف حجمها راح تطول يمكن ساعتين إلى ثلاث ساعاات .
الحشوه تسوينها من كوب سكر بني و2 م كبار قرفه ورشة ملح و2 م زبده ذايبه
أخلطي أول ٣ مقادير مع بعض .
الحين أدهني صينية بايركس بزبدة غير اللي فوق ,الحين شكلي العجينة على شكل مستطيل بفرادة العجين ، العجينة هذي جددددا مريحة في الشغل لأنها سهله جدا تشكيلها

شكليها على شكل مستطيل ح. أنا أستخدم صينية البايركس
الحين أدهني العجينة بالزبدة السايحة وبقي في الطرف العلوي حوالي ١ سم لا تدهنينه عشان نلصق العجينة بعدين .

أدهني العجينة بعدين رشي الحشوة فوقها و حاولي تكثرين يمكن ما تستخدمينها كلها بس أحسن . وبعدين أضغطي الحشوة شوي بس عشان تلصق .وبعد لا تنسين لا تحطين حشوة على الطرفة اللي فوق .
لفي العجينه وبتدي من الوسط للطرف والوسط للطرف رصيها بالصحن رصي القطع في الصينية بعدين غطيها زيييييييين وحطيها في الثلاجة ١٢ – ١٦ ساعة وهذا واحد من الأشياء اللي يخلي العجينة هذي مميزة
طيب اليوم الثاني او بعد 6 ساعات طلعيها ودخليها الفرن وخذي صحن فيه ماي حاااار وحطيه تحت الصحن البايركس لمدة نص ساعه سكري الفرن وخليها نص ساعه مثل ماقلت لج الهدف هني ننشط الخميره عسبت تنفش
عقب شغلي الفرن وخليها ثلث ساعه بتكون نفشت وجهزت

الحين تسوين الحشوه لذذذذذذذذذذذذذذذذذذيييييييييييييييذه

الحين الخلطة اللي فوق :

تغطية الفيلادلفيا العادية أصبع زبدة دافي تقريبا 118 غرام و ربع كوب فيلادلفيا كوبين سكر رشة ملح فايليا سائله اخلطيهم وحطيها بالثلاجه ربع ساعه تجمد شوي معاج وبعد ماتطلعينها من الفرن صبي الخليط

جربي وان شاء الله رح يطلع معاج ألذ سينامون ^_^ وصحتين وابي منج دعوه طيبه لي ولعيالي فديتج

للرفع