شو رايكم بمعهد الامارات للدرسات المصرفيه

السلام عليج الغلآ ..

شحآلج أبوي ..

أنا من سنتين كنت بهالمعهد طبعا نظام الدراسة كانت 4 سيمسترات السنة فيها سيمسترين ( فصلين ) يعني الدراسة سنتين و طبعا لازم تيبين نسبة اكثر من 80 % لأن الرسوب عندهم 60 فالسميسترات الأربعة كلها (للعلم إذا يبتي أول سميستر 60 لا سمح الله تظهرين على طول من المعهد و جان تبين تدرسين مره ثانية تعيدين مع بداية السنه اللي بعدها و هاي السلبية الأولى للمعهد )

بالنسبة للدراسة فالبداية على ايامي انا كان يسوون امتحان انجليزي و مقابلة شخصية طبعا بالانجليزي أما ألحين فلازم يكون عندج الآيلتس عسب تحدرينه و ما اعرف اذا للحين هم يسوون المقابلة و لا شلوها المهم اذا للحين يسوونها بعطيج بعض الأسئلة ممم خليني اتذكر بيسألونج من وين سمعتي عن المعهد و شو قالولج عنه و ليش تبين تدخلين المجال المصرفي و يوم انتي تردين هم يختبرون انجليزيتج من حيث المحادثة بس نصيحتي لج خليج واثقة و لا تترددين لأن حتى لو شافوج مترددة بيدخلونج بس بيرسبونج و عذرهم بيكون انج ما تعرفين تتحجين انجليزي .. طبعا مرات تكون المقابلة سير واحد و مرة اثنين انتي و حظج ..

بالنسبة للرسوم أنا ما أدري إذا رفعوها و لا لا بس أحييد أنه للمواطنين ع 19000 و غير حجز الكرسي 2500 و للوافدين 21000 .. ها اللي احيده

و ان شا الله اكون أفدتج و اي سؤال انا حاظرهـ