رحلتي إلى ماليزيا

التعديل الأخير تم بواسطة أنطوؤآئيه ; 2011-04-28 الساعة 11:26 سبب آخر: الوقت

ماليزيا
سلانجور (Selangor)
(3 أيام)

اليوم الأول : وصلنا مطار كوالالمبور الساعة 8 ونص صباحاً وأخذنا تاكسي من المطار (تقريباً سعر التاكسي 80 رينجت = 80 درهم اماراتي )
وتوجهنا لفندق صن واي لاقون (5 نجوم) (ٍSunway Lagoon Resort) الواقع في بيتالينق جايا (Petaling Jaya) الفندق هذا تصميمه الخارجي روعة والداخلي أيضاً ، نوع الغرفة ديلوكس (Deluxe) الصراحة حلوة وراقية طبعاً الغرفة متوسطة الحجم نافذتها كبيرة جداً تطل على المسبح والمنتجع الترفيهي بالفندق (منظر يرد الروح) وفيها حمام صغير ..
أول شي سويناه أول ما وصلنا الفندق إننا نمنا نومة طويلة للساعة 8 مساءاً وأول ماقمنا طلعنا رحلة استكشاف حول الفندق (مشي) كان موجود جنب فندقنا فندق ثاني بس ناسية اسمه مرينا عليه وبعدين شفنا أماكن كثيرة حلوة ومطاعم يعني أخذنا جولة عامة واحنا راجعين دخلنا الـ (Shopping Mall) التابع للفندق عبارة عن 3 أدوار فيه ماركات كثير مشهورة وحيوي جداً ، الدور الأول والثاني أماكن تسوق أما الدور الثالث كان مخصص للمطاعم والجلسات ، وتسوقنا في المركز اشترينا أشياء خفيفة من (U2) وعلى حظنا بدأت الأماكن تقفل على الساعة 11 تقريباً ، بعدها جلسنا اتعشينا في مطعم ( كنتاكي ) لأننا نعرفه وخفنا نجرب مطعم غريب يقوم ما يعجبنا الأكل فحبينا نمشيها أول يوم في مطعم (فاست فود) معروف.

اليوم الثاني : قمنا الصبح على الساعة 10 تقريباً ونزلنا فطرنا في مطعم الفندق (بوفيه مفتوح) جميع أنواع الفطور العالمية ، وبعدها لفلفنا شوية داخل الفندق أخذنا نظرة على المسبح ورجعنا الغرفة ارتحنا شوية بعدين بدأنا رحلة لمدينة صن واي لاقون الترفيهية طبعاً دخول المدينة الترفيهية بتذاكر (سعر التذكرة للشخص 40 رينجت) بس لأننا من نزلاء الفندق سوولنا تخفيض (التذكرة 32 رينجت) يعني دخلت أنا وزوجي للملاهي بـ 64 رينجت بس ونلعب في كل الملاهي الموجودة طول اليوم للمغرب تقريباً لأنها تفتح الساعة 11 الصباح وتقفل تقريباً الساعة 6 مساءاً .. المدينة الترفيهية كبيرة جداً فيها أشياء كثيرة (أماكن بيع الملابس والمطاعم الصغيرة للوجبات الخفيفة وملاهي متنوعة فيها السهل وفيها الخطر وحديقة حيوانات مصغرة ومتحف للأحجار الكريمة) نفس القريه العالميه بس احلى . لعبنا تقريبأً في كل الألعاب الموجودة وأحلى شي الألعاب المائية كانت مميزة .. غير هذا كله داخل المدينة فيه جسر معلق كبير جداً إذا طلعتي عليه تشوفي منه المدينة كلها والفندق (منظر خيالي) .. وفيه مثل الممشى اسمه (ممشى الفيلة) لأنه كله مجسمات لفيلة كبيرة مشينا فيه الين تعبنا .. و بعد موجود شلالات صناعية داخل المدينة ( في حياتي كلها ما شفت شي بروعتها) وفي نهاية المطاف رجعنا على المسبح جلست وزوجي راح يسبح . طبعاً رجعنا للغرفة على الساعة 6 تقريباً ونمنا للساعة 10 مساءاً وقمنا اتعشينا في الغرفة (طلبنا عشا من الفندق) ويا سلام على طعم الأكل كان حلوو .

اليوم الثالث : قمنا الصباح الساعة 8 وفطرنا في مطعم الفندق كالعادة (طبعاً البوفيه تتغير أصنافه كل يوم) وانطلقنا بعدها لوسط مدينة كوالالمبور المتميزة بالتوين تاور (twin tower) والأسواق المشهورة .. اتمشينا في شارع العرب والأسواق وأخذنا جولة عليها كلها اشترينا ملابس وكاميرة فيديو (لأننا كنا جايبين الكاميرة الفوتوغرافية بس وقلنا لازم مانفوت الرحلة بدون تصوير فيديو يجلس ذكرى حلوة) بعد ما اتسوقنا قعدنا في كوفي شوب وأخذنا سناك خفيف ورجعنا للفندق على الساعة 6 تقريباً ونمنا وقمنا بالليل على صوت دق الباب ، وكان يومها (عيد الحب) الفالنتين عندهم فجابولنا حلويات (أنواع من الكيكات والآيس كريم) بس طبعاً الحلويات هاذي مايقدموها إلا للمتزوجين حديثاً يعني عارفين إنهم بشهر العسل كضيافة حلوة .. بعدها طلعنا رحلة تصوير للفندق وكل شيء قريب منه من مطاعم وكافيهات وأسواق وجلسنا اتعشينا في مطعم ايراني اسمه (نور الشمس) بصراحة أكله لا يعلى عليه .. وقبل مانرجع رحنا لسوبر ماركت واشترينا حلويات وعصيرات مختلفة .

ارجو عدم الرد

جزيرة لنكاوي (Langkawi Island)
(يومان ونصف)

اليوم الرابع : قمنا الصباح الساعة 8 وفطرنا في الفندق وأخذنا آخر جولة قبل السفر وصورنا بالفيديو الفندق من الداخل والمسبح ، بعدها رحنا المطار على الساعة 10 ونصف وسافرنا عن طريق طيران (Air Asia) ووصلنا مطار لنكاوي الساعة 12 ونصف ظهراً ، وأخذنا تاكسي من المطار وتوجهنا لمنتجع فندق شيراتون بيردانا (5 نجوم) (Sheraton Perdana) ، نوع الغرفة سي فيسينق (Seafacing) حجمها متوسط وفيها بلكونة حلوة تطل على حديقة المنتجع والبحر أما حمامها كان كبير تقريباً ..
طبعاً حطينا الشنط في الغرفة وطلعنا بعدها رحلة بحرية دامت الساعتين (سعر القارب 280 رينجت) وهذه الرحلة اسمها رحلة نهر المنكروف (Mangrove River) استكشفنا خلالها أماكن كثيرة منها :
1- النسور (Eagle) : مرينا على منطقة بالقارب يكثر فيها النسور اللي تتسابق في التقاط فريستها من داخل النهر وطبعاً كان منظرها حلو جداً.
2- كهف التماسيح (Crocodile Cave) : منطقة نمر فيها بالقارب من تحت كهف مليء بالتماسيح بس على حظنا شكل التماسيح كانت نايمة وماشفنا شيء بس شفنا الوطاويط اللي كانت متعلقة في هالكهف ,
3- مزرعة الأسماك (Fish Farm) : منطقة ننزل فيها على مبنى خشبي مقسمينه تقسيم على شكل مربعات وفي كل مربع بركة صغيرة فيها نوع من أنواع السمك (فيه سمك خطير وسمك عملاق وسمك أشكاله غريبة) وتابع للمكان هذا مطعم يقدمون فيه طعام بحري من نفس هالأسماك.
4- كهف الوطاويط وجزيرة القرود (Bats Cave) : جزيرة تكثر فيها القرود والأشجار الموجودة في هذي الجزيرة على شكل حبال متعلقة عشان يسهل على القرود التعلق فيها طبعاً غير هاذا موجود كهف كبير مظلم جداً (تحتاجون فيه لكشاف غالباً يكون مع قائد القارب) موجود فيه عدد هائل من الوطاويط طالعنا على كل شيء موجود ، واللي يميز هالجزيرة إنهم واضعين فيها جسر خشبي يسهل فيه التنقل بين الكهف والجزيرة.
5- رحلة بحرية للمحيط : بعد ما خلصنا هالأماكن كلها توجهنا بالقارب للمحيط الهندي أخذنا جولة كاملة على أغلب جزر لنكاوي وشفنا فيها من بعيد جزيرة تايلند ورجعنا للشاطئ (الصراحة كانت أحلى رحلة بحرية) ويومها كان الجو مغيم وأمطار طول الوقت.
بعدها رجعنا للفندق على الساعة 6 مساءاً ومن كثر التعب نمنا لثاني يوم.

اليوم الخامس : قمنا الساعة 4 صباحاً وفطرنا فطور خفيف في الغرفة (طبعاً اليوم اللي قبله ما أكلنا شيء من حلاوة الرحلة نسينا الأكل) وعلى الساعة 7 طلعنا أخذنا لفة في المنتجع ومنه طلعنا على البحر اتمشينا ورجعنا فطرنا فطور ثاني في مطعم الفندق (بوفيه مفتوح) كان المطعم رائع لأنه مكشوف ونقدر نطالع على البحر ، بعدها استعدينا للرحلة البرية في جزيرة لنكاوي طبعاً استأجرنا فان (Van) مع السائق (سعر الرحلة 260 رينجت حوالي 6 ساعات) وتضمنت الرحلة الآتي :
1- عالم ما تحت الماء (Underwater World) : مبنى ضخم فيه أنواع كثير من الكائنات البحرية ومركز للهدايا التذكارية (سعر التذكرة للشخص 38 رينجت).
2- التلفريك : كانت جولة ممتعة طلعنا فيها لارتفاع 700 كيلو متر عن سطح الأرض وشاهدنا الجبال المكسوة بالأشجار ومشينا على جسر يفصل بين جبال كثيرة وقدرنا نشوف جزيرة لنكاوي بالكامل من أعلى الجبل (ما أقدر أوصف المشهد من شدة روعته) وبعد مارجعنا اشترينا من مركز الهدايا التذكارية أشياء بسيطة تذكرنا بهذا المكان.
3- شلالات عيون السبعة : مكان نصعد فيه على الدرج (مشي على الأقدام) حوالي الربع ساعة بعدها نصل للشلالات (جلسنا في هالمنطقة يمكن ساعة ونصف من جمالها) ونزلنا في مياه الشلال الحلوة ومشينا واستانسنا، كان مكان رومانسي جداً وخيالي بنفس الوقت.
4- شلالات التومرون : عبارة عن منطقة جبلية يكثر فيها القرود طبعاً وصلنا للشلال بعد ما تسلقنا بين الجبال (كان المشي متعب جداً وخطير بس كان موجود درج بسيط مبني من الأحجار) كانت المنطقة محصورة بالجبال من جميع النواحي والشلال يسقط من الأعلى للأسفل ويصب في بركة عميقة (وكان فيها قرود) طبعاً كان معانا أجانب كثير يسبحوا في هالبركة ، جلسنا اطالعنا واتصورنا في هالمكان صور فوتوغرافية لأنه الفيديو خلص علينا واحنا في منطقة الشلالات السبعة.
بعدها رجعنا اتعشينا في مطعم الفندق وانتهت رحلتنا لهذا اليوم.

اليوم السادس : قمنا الصباح الساعة 8 وفطرنا في الفندق واتمشينا على البحر شوية بعدها جهزنا الشنط استعداداً لرحلة جزيرة بينانج وسافرنا عن طريق البحر (سفينة الفيري) (Super Fast Ferry Ventures) سافرنا الساعة 2 ونصف ظهراً.دامت الرحلة حوالي الساعتين ووصلنا لميناء بينانج الساعة 5 ونصف وأخذنا تاكسي من الميناء وتوجهنا لمنتجع فندق موتيارا بيتش (5 نجوم) (Mutiara Beach) ، نوع الغرفة جراند ديلوكس سي فيو (Grand Deluxe Seaview) ما شاء الله الغرفة كانت جداً كبيرة وواسعة وفيها بلكونة كبيرة مطلة على الشاطئ والبحر غير الأثاث اللي موجود فيها جداً راقي ، والحمام كبير جداًموجود فيه ساونا (من حلاوته تقدرين تنامي فيه هههههههه) وفيه مغسلتين طبعاً زوجي أول ما شاف المغسلتين قال اختاري وحدة لك ولا تجي للثانية كل واحد يغسل في مغسلته وراسمين لنا على السرير قلبين داخل بعض ببتلات الورود بمناسبة شهر العسل (يعني حركة للعرسان) بصراحة كانت أحلى غرفة بين جميع الغرف اللي سكنا فيها ..
طبعاً بعدها رحنا اتغدينا في مطعم (كنتاكي) (له طعم خاص في ماليزيا) وأخذنا جولة (مشي) في شارع بوتوفرنجي ورجعنا للفندق اتمشينا حول المسبح والشاطئ بس كان المكان مظلم والأنوار مقفلة لأننا رجعنا متأخرين فما شفنا شيء وطلعنا للغرفة ومو قادرين ننام عشان الورود اللي على السرير كان شكلها حلو هههههههههههه بس آخر شي اتنازلنا وشلناها ونمنا.

ارجو عدم الرد