تخطى إلى المحتوى
الرئيسية » خبراتكم يا اولياء الامور

خبراتكم يا اولياء الامور

بسم الله الرحمان الرحيمو الصلاة و السلام على أشرف المرسليننبينا محمد صلى الله عليه وسلم

السلام عليكم ورحمه الله وبركاته

بنات انا سجلت بنتي لل K G
وابي استفيد من خبراتكم ونصايحكم وتجاربكم

كلامي موجه للامهات اللي يتابعون عيالهم بالدراسه

بما انه الدراسه خلصت

شو اللي اتعلمتيه خلال العام الدراسي يعني شو الخبرات اللي اكتسبتيها
كيف تتعاملين ويا عيالج
شو الشي اللي لاحظتيه انه رفع مستواهم الدراسي؟؟؟
وشو الاشياء اللي قلتي ليتني ما كنت اسويها خلال الدراسه واثرت على دراستهم

وبالنسبه للاكل؟ واللنش بوكس ونظامهم كيف

بقولكم مثال

وحده قالت انا العام الياي ما بكون اخلي بنتي ترقد العصر
ليش؟؟؟
لانها يوم ترقد العصر تسهر الليل وتنش الصبح وهي رقاد وضرابه وما تتريق عدل
وفوق كل هذا تنام بالمدرسه وبتبدي معاها من قبل الدراسه العام الياي بها النظام
عشان تتعود الرقاد من وقت وتنش من وقت

شو تنصحوني
شو اللي لازم اركز عليه وشو اللي لازم اتغاضى عنه؟؟؟

الوسوم:

5 أفكار بشأن “خبراتكم يا اولياء الامور”

  1. حياة
    الرد

    السلام عليكم الغاليه أنا عندي بنت أختي الغاليه أنا أدرسها وأنا أشتري لها الأغراض المدرسة وأنا أعلمها أولا لا تخلينها ترقد العصر
    أنا أسوي حق بنت أختي الغاليه أولا تتعشي الساعه 8 وترقد الساعه 9 فليل ترقد وأنا أقوم الفجر الساعه 5 علشان أصلي وبعدين الساعة 6 أوعيها من النوم وحمدالله وتتغسل وبعدين تاكل الفطور مالها أنا أسوي لها وبعدين أنا أوصلها المدرسة وأنا أدخل شنطة الصف مالها يوم تخلص الدوام أنا بعد أخذها من المدرسة وأتي تاكل غداء الظهر وبعدين ترتاح وبعدين أذاكر لها الدروس أول بأول وخليها تحل واجباتها وما شاء الله شاطرة وتتطلع من الأوائل والعصر ما ترقد لين الساعه 9 فليل ترقد من تقوم الصبح ما ترقد لين فليل وحمدالله رب العالمين ويوم تخلص من المدرسة الأمتحانات ونتجح وبعدين تدرين وقت الإجازات طويله أدخلها دورات مثل دورت الأنجليزي دورت كمبيوتر وحمدالله خذت شهادات كلها أمتياز وحمدالله وهي حين في الصف الثالث الأبتدائي بس عليج لا أتخلينها ترقد العصر ألعبي معها مثل أتيبين أقلام الألوان ترسمين لها أشكال وأنتي بعد تلونين معها علشان أتحس حد معها وجذه ما بترقد العصر.

  2. فريال
    الرد

    موضوعج حلو ومفيد وااااايد للكل …

    شوفي أنا عندي ولد ربي يحفظه أحين مخلص كي جي 1 و بيروح كي جي 2 …
    في تجمع أنا فاتحتنه بامكانج تشوفينه في الرابط تحت بحطه لج ..
    فيه أوراق عمل و يوميات عيالنا .. أشياء بتستفيدين منها ان شاء الله ..

    http://forum.uaewomen.net/showthread.php?t=568056

    ومثل ما ذكرتي المتابعه أهم شي .. أول بأول

    أنا خاصه في البدايه كنت أحاول أتواجد باستمرار في المدرسه عسب أعرف المعلمه أكثر وتعرفني و بنفس الوقت أتواصل وياها بخصوص ولدي و طبيعي في البدايه التغييرات وايد اللي بتصير خاصه لين يتأقلم مع الوضع و بعد ما يتأقلم بتبدا مشاكل اليهال و عفستهم وطبعا بما اني كنت عارفه ربعه عدل من خلال زياراتي فخليته يبتعد عن الأطفال اللي حسيتهم مب أوكيه سلوكيا و قلت له خلك مع هذيل و نبهت على المعلمه بعد عسب ما تخليه يختلط باليهال الشياطين … ترى في ما شاء الله أشكال وألواااااااان !!
    بس أحلى شي اني قدرت أنمي ثقته بنفسه و كل المسابقات اللي تسويها المدرسه أخليه يشارك فيها ومن بينها مسابقه حفظ القرآن والحمدالله شارك و فاز و كرموه بعد .. هالشي يدعمه نفسيا و يشجعه على انه يكون متميز ان شاء الله مستقبليا ..
    و أهم شي علشان يكون تحصيلهم الدراسي فووووووووق خاصه في البدايه لازم تطبعين أوراق عمل أنا كنت يوميا حتى لو المعله عاطتنه واجب بعد أطبع له أوراق عمل وأخليه يكتب علشان يمرن ايده على الكتابه و بنفس الوقت علشان ترسخ الحروف في باله و أربط له بين الحروف والكلمات وماخذتله كتب تعليميه للحروف عربي وانجليزي .. كلها تعب شهور بس يبان في النتيجه ويفرح قلبج ☺

    و طبعا بخصوص الأكل الحمدالله كان الأكل على المدرسه نحن ندفع مبلغ سنوي وخلاص ( روضه نموذجيه ) ..
    و بخصوص النوم ولدي كنت أرقده الساعه 7 ونص و أوعيه 6 و ثلث ومرات يرقد قبل بعد .. وطبعا ما في نوم طول اليوم لأنه فعلا لو رقد الظهر بيسهر بالليل وبالتالي تبدا معاناه الصبح !!

    و الله يوفق الجميع يا رب …

  4. إخلاص
    الرد

    مشكورات خواتي يزاكن الله خير

    وشو بالنسبه للبس؟؟؟ انا اللي ادري انه المدرسه بيفصلون لها لبسين
    بس هل تنصحوني افصل لها انا اكثر؟؟
    وبالنسبه ليوم الرياضه شو نصايحكم

    وشو الاشياء اللي جربتوها وما استوت وكانت تجربه فاشل او ناجحه؟؟
    واللي عندها بنات شعورهم طويله كيف تسبحهم؟؟؟ الصبح او الظهر او الليل؟

    ادري اني طولت بس ابي انا استعد عشان ما اتوهق
    بكتب ها المعلومات عندي وبحتفظ فيها

  5. كوثر
    الرد

    البنات كفن ووفن

    بنتي الحينه مخلصه كي جي 1
    والمدرسه مال الانجليزي عاطتنهم كتب للاجازة>>>>هذا نظامها حتى في اجازة الربيع عطتهم كتب للاجازة
    بس بنتي بعدها ما بدت

    حاليا مب عارفه كيف ارتب جدول الاجارة
    بدت تسهر …بس ماباها تسهر وايد بس الحلوو انها ما تنش من وقت
    وفي نفس الوقت لو عودتها ترقد من وقت بتنش من الفير وانا اللي بتلعوز وياها !!!

    والله ساااالفه

    لي رجعه ان شااء الله

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.