حوار شعري بين الشيبه والعيوز

الشيبـــه :
قلبي شباب ولازم اني اعرّس مابا العيوز اللي تتوسّد على الباب
الخير وايد وانا ماني مفلّس عندي فلوسٍ تدعم البنك في الحساب

العـــيوز :
ما باقي غير خشمك وهالضرس تبغي تعرس وانت غادي كالغراب
قابل صلاتك الله يشفيك من المس والاّ ترى باطب ويهك بالتراب

الشيبـــه :
إنتي عيوز وأكلك الروب والخس اما انا ماكل سوى تكه و كباب
ما فيني سكر غير ضغطي نازل بس دام الهوى فيني ترى كل شي طاب

العيـــوز :
لا بارك الله فيك يا الشيبه يا النحس ما تيبك الرمسه ولا ايبك اعتاب
قصرلي صوتك مابا اسمع ولا حس عطني طلاقي وانقلع واقبض الباب

الشيبـــه :
دومك نحيسه وذا لسانك يبا قص ربي ترى حلل لي اربع بالكتاب
هذا خميس الاعمى يا كم عرس؟ مرتاح في الدنيا بلا اهم واعصاب

العيـــوز :
بطران وراسك كالصخر يابس وعص مالوم طبعك يوم ربعك هالكلاب
غادي شرا الاريل ودومك اتحيّس استح على ويهك أصلع ولعاب

الشيبـــه:
فكيني من ويهك ترى مالي أي نفس زهقان من شوفك وابغي لي أحباب
هذا طلاقك طالقه اربع وخمس شلّي طلاقك من ضميري بلا احساب

العيـــوز :
مشكور يالشيبه ومن دون أي دس! عندي حبيب ما ابتعد لحظه وغاب
يشريك ويبيعك تراه ابثمن بخس ما تسوى ظفره حلوٍ اسمر وجذاب

الشيبـــه :
يالله قبل لا موت منك واغتص طلعتي لي قرنٍ وراسي بعد شاب
يا شينه البرقع ترى قدرك اختس عيوز ولك في الدنيا خلان واحباب

العيـــوز :
مثلك تراني وهذا لك في العمر درس لاني أميز بين شيبه وشباب
والا نسيت اني على الموضه ألبس ما علموك اني بلا شيله وحجاب