تعرفيــن حد له اسمين ؟؟ أو انتي لج اسمين ؟؟ تعالي >.<

صباح الورد

شحالكن عساكن بخير وعافيه يارب ..

في البدايه بليز لا حد يضحك :$ لوول واللي بتضحك لا تقرا الموضوع! < لا تلومونها لوول

بصراحه يمكن البعض يعتبرها شي عادي ..
بس انا اعتبرها مشكله وأحس مسويه لي ازمه نفسيه ومأثرة ع شخصيتي وحياتي!

السالفه ومافيها ..

انا لي اسمين ..
والسبب لهالشي اني يوم كنت صغيره وبما اني اخر العنقود ..
خواتي بغن يسموني بإسم خفيف ودلع ..

وابويه طبعا ماوافق لأن ع قولته الاسم ماله معنى ومب ثقيل ..
واقصد بالثقيل اللي هي اسامي الاول .. يعني مريم – فاطمة – عائشه – صالحه ..
والاسم اللي بغن خواتي يسمني وايد حلو وبسيط .. ومعناه حلو .. مكون من ثلاث حروف ..

بس ابويه موول ماطاع .. وسار وسجلني في الجواز بإسم اللي هو بغاه ..

شو اللي صار عقب!!

ان خواتي والاهل يزقروني باسم .. < وهالاسم وايد عايبني واحس فعلا هاي شخصيتي انا!!

وفي الجواز والاماكن الحكوميه … وبعض ربيعاتي في الجامعه يسموني بإسم ثاني ..
وللعلم موول محد من الأهل يزقرني بهالاسم .. عيل ليش مسميني ومعقدين عليه حياتي ماعرف !!

وبصراحه مب عارفه كيف اشرح لكم نفسيتي ..

احس انا مب أنا ! ..

يعني مع مرور الوقت صارت فيني تناقض في الشخصيه بوايد امور ..

اسمي اللي مكون من ثلاث حروف ..
فرفوشيه – ثرثاره نوعا ما – جريئه – ثقه بالنفس – دلع < من الثقه مب مياعه ..
فيني وايد من هالاشيا بس مارووم ابين وابرز شخصيتي
لأني حاسه في اشيا حاكرتني يعني فارضين عليه شي انا ماريده لسنين طويله ..

يعني تخيلو معاي ..
ع سبيل المثال .. انتي طوول عمرج يزقرونج باسم منى ويدلعونج بعد منايه .. ومنوتي ..
وعقب يقولون لج انتي اسمج حمده مب منى … !! انتي اسمج حمده !! ماعرف كيف ..
فيه شي غلط بالموضوع .. موول مب قادره اتقبل ! ..

ومن اسير الاماكن الرسميه والجامعه مثلا .. يزقروني باسمي الثاني ..
أحس هاي وحده ثانيه مب أنا ! بس انا يسموني بهالاسم!
هاديه موول مالي حس!!
يعني يوم اسوي شي ما اسويه لأني أنا فلانه وعندي مبدأ ولازم اسويه ..
مجرد اني اخلص الشي وخلاص!! ماعرف كيف اوصف لكم هالاحساس ..
لأني باختصار هاي مب أنا .. ف ليش اسويه بضمير وحب !
بس اللي اسويه اني اساير اهلي واللي يبونه!!!
مول مب حاسه بالثقه ..

لدرجه ان صار موقف في الجامعه تأكدت من هالشي فعلا !! @_@
يدرسونا في الجامعه كورس ومن ضمن هالكورس في اشيا نسويها تحلل الشخصية ..

ويوم سويت التحليل طلع عندي فعلا تنافض في الشخصيه!!
نفس ماذكرت لكم فوق .. وحليلها المس تمت مصدومه تقول كيف !
انا اول مره اشوف هالشي يصير لوول

والله يابنات هالشي وايد مضايجني ..
حاسه هاي ابسط حق لي .. ليش حارميني منه

وايد تصيرلي مواقف وانحرج … يعني مثلاً اذا بغيت اسجل في فعاليات ..
وبغيت احط اسمي الاول ( اللي من ثلاث حروف ) ماعندي شي يثبت هالشي!
فلاازم احط اسمي الثاني عشان يثبت هويتي ..
وانا مول ماحب الناس تزقرني بالاسم الثاني .. ولا احب الناس تعرف عني …
ومش معقوله اسير اخبر كل حد اسمي جيه وازقروني باسم ثاني !
بيكون الوضع غريب شوي!

طلبت من اهلي ييثبتوني ع اسم واحد ..
جان امي تزعل اونه ابوج ماكان راضي عن الاسم الاول ف مسمينج ع اسم امي (يدوتي)
ليش عقب ما توفى تبين تغيرين اسمج … ؟؟ قلتلها شو اللي يضر او يأثر يعني!!
انا مول مب مرتاحه باسمي .. جان تزعل وماترمسني …
جان اقولهم مب ع كيفهم .. انا اسمي بغيره يعني بغيره
وفكرت اغيره على اجازه الربيع لأن بيكون فتره اجازه واروم اتابع اجراءات تغيير الاسم ..
بس امي بعدها شايله بخاطرها عليه … بس والله يا بنات والله وايد ماثر عليه هالموضوع ..

والله مب عارفه !
اسمحولي كلامي مب مرتب ..
لأني اقولكم وانا وايد متضايجه وشايله بخاطري من هالموضوع سنين
تكلمت الحينه يوم كبرت صرت اختلط مع الناس اكثر .. مسببلي احراج والله ..