تعبت وتعبت .الله المستعان

انا مثلج يالسه ويا اهل ريل وادخلوا وااايد وما زالوا ونفسيتي كانت زفت والريل بارد ما يتحرك… اللي سويته ما ادخل بيتهم انا ساكنه في ملحق لكن في نفس الحوي… ما يشوفوني الا وقت الغدا… الويك اند طبعا لا… ما اقصر اشل واحط واسوي لوجه الله مب علشان حد فيهم.. اطنش قد ما اقدر طاف محترم حق كل حد.. كنت مثلج اتحسس وافكر مرضت تعبت محد يحس فليش اذبح عمري على ناس ما تهتم… فقمت اطنش واعيش حياتي.. حتى في تدخل عيالي جدامهم اسكت ضربوهم عاقبوهم شو ما كان احترام بس… لكن ادخل البيت افهم عيالي اذا كانوا صدق غلطانين واذا لا اقولهم ما عليه عمو ما عرفت علشان ما اخرب العلاقات وينولد الحقد والكره…
عندي لج نصيحه وحده… الصبر + طنشي … فكري في شي واحد العمر يمر وانا بعيش مره وحده فليش اضيق على عمري واحرق في اعصابي ونفسيتي زفت… اضربي كلهم بعرض الحيط وسوي اللي ربي يامرج عليه وابعدي نفسج عنهم… سيري عندج اهلج ربعج اشغلي نفسج وااااايد عنهم… (( مع العلم انا يالسه ويا اهل ريل وانا متغربه يعني مب في الامارات عايشه ولا اهل عندي ولا شي بس اهله)) فطنشي وطنشي …

والله يهديهم ويصلحهم يارب..

انا عندي راي ثاني:

انتي تركتي بيت ابوج وأصبحتي فرد من عائلة ريلج صح؟

حاولي تندمجين وياهم واتكونين صديقة لكل واحد في البيت…. خليج انتي الحنونة…. اذا وحدة من حمياتج اتضايقت تلجألج وتفتح قلبها لج… وأم ريلج تراها يدة عيالج ولها الحق انها تآمر وتنهي واتقول ليش جي لابسين وليش وليش وهي من حبها لهم اكيد تخاف عليهم واكيد عيالها لما كانوا ضغار جي كان أسلوبها معاهم لا تفتكرين أن طريقتنا في التربية بتكون نفس طريقتهم….

أختي أنا أغلب طلعاتي للمولات والمطاعم أعزم عمتي وحمياتي وآخذهم وياية والله انا نستانس ونفرح ويا بعض…. قبل العيد بشهر آخذلهن قطع عشان يخيطن للعيد…. لما زادوا راتبي خذيتلهم هدايا…. دايما اخاذلهم هدايا (تهادوا تحابو) …

أختي انتي لازم تفهمين أنهم متعودين على ان أخوهم يكون معاهم ويلبيلهم طلباتهم ويعطيهم فلوس اذا احتاجوا بس لما خذاج أكيد هاي الاشياء قلت فشي طبيعي يغارون ويحسون بالنقص لا اتلومينهم ترا نحن بعد حسينا بفقدان اخوانا بعد ما عرسوا…

ليش معيشة عمرج في هم وانتي الحل بإيديج….. لا تترين الناس تتغير عشان ترتاحين…. انتي تغيري ….

اذا مرة كنتي ضايجة افتحي قلبج لوحدة من حمياتج وعطيها الثقة… اذا بيزورون بيت خالتاهم والا عماتهم سيري معاهم دوم…. سوي طلعة جماعية بسيارتكم مرة كل اسبوع او اسبوعين…. بالمختصر المفيد خليج جزء منهم تفكرين مثلهم وعشانهم وصدقيني بترتاحين وبيحبونج وبيعزونج وعقب بالتدريج خلاص بتخف الغيرة من قلوبهم وبتحسين اهم تركوج في حالج….

كلامي هذا عن تجربتي انا واختي والحمدلله اهل رياييلنا حاطينا فوق روسهم…. الحمدلله الحمدلله الحمدلله….