تجهيزات الولادة القيصرية من الألف الى الياء

قبل العملية بيومين : 
– اغسلي ثياب و فوط الياهل و رتبيها في الأدراج و الخزانة  
– اغسلي طقم شراشف السرير و جهزيهم حق وراء بأجر قبل لا تروحين المستشفى .. عشان من توصلين البيت يكون كل شي جاهز و انتقالج للبيت يكون انتقال مريح و بدون اي نرفزة او تعب او مشاكل ..
– جهزي ثيابج لفترة النفاس و أكويها و علقيها في الكبت .. 
– انصحج تحطين كل هالنقاط في جدول اعمالج و ترتبين خطط تطبعينها على ورق للخدامة و المرافقة اللي بتكون وياج عشان ما ينسون شي و تحصلين كل شي جاهز جدامج ..   

قبل العملية بيوم : 
– الصبح  خلصي اشغالج من السوق و اخذي كل النواقص و الاشياء اللي بتحتاجينها في المطبخ في فترة النفاس ( حبة حمرا و حلبة و ينسون و غيره) .. لان الطلعة بتكون صعبة  عليج اول اسبوعين بعد الولادة ..  
– الظهر سوي مناكير باديكير و تنظيف بشرة و حمام زيت و سيشوار ..
– المساء افرشي فراش الطفل و جهزي غرفتج لاستقبالج و استقبال البيبي 
– قبل النوم حطي الكاميرا و التيلفونات و الاي باد على الجراجات .. خذي حمام دافي و ارتاحي وراج يوم طويل و متعب لكنه مليءبالاثارة..  

شنطة اول يوم ( يوم العملية):
طبعا هالشنطة بتكون فيها وايد اغراض لج و للبيبي .. و تختلف عن شنطة اللي بتولد ولادة طبيعية .. بعض المستشفيات يفضلون انج تاخذين شاور عندهم  قبل العملية مباشرة .. تأكدي قبل عشان ما تتعبين نفسج في البيت على الفاضي ..  
– من بودي شوب خذت علبة صغيرة بنكهة الفراولة العلبة أيي فيها الشاور جيل و البودي لوشن كلهن حجم صغير و ليفة صغيرة حمرا – بخاخ للجسم بنفس النوع – مربعات الفوط الصغيرة الملونة خذت 3 بألوان مختلفة وحدة للوجه ووحدة للجسم ووحدة للأرجل    
– من ماركس اند سبينسر خذت فوط التنشيف السريع لانها تجفف بسرعة و تنشف بسرعة حق ثاني استخدام.. خذت منها نوعين .. فوطة الجسم المستطيلة و فوطة الشعر التوربان ..
– اكون غاسلة شعري قبل بيوم و مسشورتنه او ملفلفتنه و مرفوع عشان البس طاقية البلاستيك الخاصة للعملية .. بس أخذ شاور بدون ما إبلل شعري.. عقب الشاور احط كونسيلر و اكحل عيوني و مرطب شفايف عشان الصور اللي باخذها لي و للبيبي اول ما اطلع من العملية ما تكون صور فلم رعب .. لا تنسون تعقون الطاقية و تعدلون شعركم قبل لا تطلعون جدام الزوج .. 
– للبيبي أخذ له لبستين من  : ملابس داخلية – اوفر اول- طاقية و قفازات – قماط و برنوص صغير … و أخذ له حفاظات و كريم الحفاظات و شنطة صغيرة فيها شامبو و صابون و كريم الجسم و أعواد الاذن و مشط .. للمغص أخذ له زيت زيتون لمساج منطقة البطن و نقط انفاكول ..
– كاميرا مجرجة جاهزة و فيها ميموري كارد يديد مع جراجتها – التيلفون مع جرارة – اي بود او اي باد مع الجرارة و السماعات عشان تسمعين قران او موسيقى هادية تساعدج على الاسترخاء في الليل ..  
– نوعين من الشباشب .. واحد فرو او قطن  للغرفة عشان تدفى ريولكن ( زارا هوم او ماركس و سبينسر) و الثاني بلاستيك للحمام و انتوا بكرامة ( شو مارت او اكسيسورايز) ..
– جوارب قطنية للترطيب مع كريم للرجلين بالنعناع ( بودي شوب) .. لان بعد العملية بتكون الريول متنفخة .. خلي حد من خواتج تمسح لج ريولج بفوطة فيها ماي حار و عقب تحط لج الكريم على ريولج و تسوي لج مساج من عند قاعة ريلج لين الركبة و تلبسج الجوارب عشان أدفي ريولج و تنامين مرتاحة..
– شنطة صغيرة فيها : محارم تنظيف البشرة ( ماك) و كريمات الويه و العيون و مراية صغيرة  .. قبل لا انام امسح ويهي و عيوني بالمناديل و اخلي اختي تحط لي ماي دافي في فوطة صغيرة و امسح فيها بقايا المكياج .. و عقب احط كريم الليل للويه و العيون ..
– مخدة الرضاعة ( مذركير) 
– ستيان الرضاعة ( مذركير او ماركس و سبينسر)
– كتاب الطفل اطبع فيه بصمة الريل و اليد و اكتب فيه معلومات  و صور عن الطفل من اول يوم لين ما يكمل 5 سنوات و احتفظ فيه كذكرى ليوم ولادته .. 
– مخدتي و لحافي الخاص اكون يايبتنه معاي عشان يساعدني في النوم لان ريحة فراش المستشفى تضايقني .. او أخذ عطر الفراش الخفيف ارشه على فراش المستشفى من the white company

المشاركة الأصلية كتبت بواسطة *7rm s3eed*

موضوع حلو ومتعوب عليه
يسلموؤ

تسلمين حبيبتي و مشكورة على المرور الاكثر من رائع

الشنطة الكبيرة:  
 – شنطة صغيرة فيها : فرشاة و معجون و رغوة تنظيف البشرة – شامبو و بلسم احطهم في علب صغيرة – سيروم الحماية – سبراي الشعر حجم صغير – مزيل العرق  
– 4 علب الويز او كوتيكس الليلي   
– لما بتاخذين شاور ثاني يوم الصبح .. الممرضة بتستخدم فوطة صغيرة عشان التنظيف عطيها وحدة من الفوط اللي عندج .. حطي البودي لوشن و رشي من البخاخ و مزيل العرق عشان تحسين بنتعاش .. 
 – خذت من ماركس و سبينسر full brief .. الكلسون يكون لين الخصر يعني ما بيضغط على الخياطة و لا بيحتك فيها مثل الكلسون العادي-و ستريجات قطنية حق تحت اللملابس و خذت ستيان الرضاعة – دوائر الرضاعة القابلة للغسيل من مذر كير او بيبي شوب  
– 8 قميص نوم شيفون او حرير للاستقبال مع شيلهم ( ليس ارت و بون دانة) 
– 4 قمصان نوم قصيرة حق في الليل مع روب 1 طويل .. ما خذت بيجايم لان البنطلون ممكن يحتك في الخياطة و يضغط عليها ..
– مشد خاص بالعملية القيصرية  AbdoMend بستخدمه لمدة أسبوعين لين يطيب الجرح خذته من  amazon.com
– شنطة العناية بالأظافر ( أسيتون – طلاء أظافر – طلاء حماية الأظافر و طلاء اللمعة  و زيت الأظافر و مبرد كريستال و مقص الجلد و الاظافر) لو كنتي من النوع اللي يحب المناكير و ترتيب الأظافر مثلي  
– سيشوار الشعر و فرشاة و مشط الشعر – كليب و شباصات صغيرة و حلق  نفس ألوان ملابس الاستقبال    
– شفاطة الصدر Swing  و كريم Madela  للرضاعة و لصقات الصدرHydrogel pads لو انجرح الصدر من الرضاعة من مذركير
– وسادة التدفئة Electric Heating Pad عشان المغص اللي يصير لي بعد الولادة أخذها من الصيدلية.. استخدمها بعد حق البيبي لو فيه مغص.. احط فوق وسادة التدفئة فوطة ثقيلة و احط البيبي على بطنه عشان يدفى  هالحركة وايد تريح الياهل اللي فيه غازات  
– شنطة صغيرة فيها فيتامينات الحمل – حبيبات اجيولاكس  Agiolax لمقاومة الإمساك أخذها ثاني يوم بعد العملية في الليل قبل النوم. 
  
شنطة البيبي:
– ملابس داخلية 8 – 4 طاقيات و 4 ازواج من القفازات و 4 قماطات  
– اوفر اولات 8 
– لبس خاص للخروج من المستشفى 
– 8 قطع الفوط للكتف Burp Clothes عشان ما يزوع عليج الياهل و يخيس ثيابج من مذر كير 
– شنطة العناية الصحية فيها مقص الأظافر و شفاط الانف و مقياس الحرارة 
– 2 – 4 شراشف قياس سلة موسى حق سرير الطفل في المستشفى .. ما احب شراشفهم عنقاش