تجمع الأمهات اللي بدوا يأكلون كتاكيتهم** ربي يحفظهم

السلام عليج اختي عوشه

هذي اول مشاركه لي بالمنتدى مع اني من زمان مشتركه بس عيبني موضوعج وحبيت اشارك وإن شاء الله نستفيد من بعض .

انا بنتي شوي وبتدش الرابع , بديت وياها الأكل هذا الأسبوع سويتلها عيش ميلوبا مع الحليب وحطيتله شوي عسل لاني حسيتها ما تقبلته اول شي . عطيتها اياه بكميه بسيطه وخليتها وجبة ما قبل النوم.

هذي بدايتي وياها وإن شاء الله ناويه اجربلها التفاح والكمثرى المهروس لانه رمضان ياي وأكيد الرضاعه بتقل.

والله المستعان .

أنا مشيت مع كلام الدكاترة وأكلت بنتي في الشهر السادس
أول شي كنت أعطيها أرز الاطفال من ميلوبا
أول اسبوع كنت أعطيها 3 أو 4 لقمات بس
وبعدين زودت الكميه..ولمدت أسبوعين
بعدها بديت ادخل الخضروات…أول شي سويتلهاعلى ما أعتقد كوسا
وأكلتها منها 3 أيام.. وبعدين بطاط بعد 3 أيام
كل نوع أخليها تاكل منه ثلاث أيام بعدين أغير
أذكر عطيتها فاصوليا… جزر…بازلاء…مسلوقين وبس بدون اي اضافات
واذا كانت ماتتقبل الطعم …كنت أحط عليه شوي من أرز الاطفال
بعد ما جربت كل نوع بروحه صرت أخلط الخضروات
مثلا بطاط مع جزر أو بطاط وبازلاء…بطاط وجزر وكوسا
كل خلطه اعطيها منها 3 أو 4 أيام بعدين أغير
طبعا مرات كانت ماتتقبل الطعم …بمجرد ما أحط اللقمة في حلجها تصييييح
حتى ما تحاول تذوق…لكن أنا ما أستسلم
اذكر أول مره عطيتها بازلاء ما عجبها …وما بلعت ولا لقمة
قمت أنا أحط شوي على طرف صبعي وأعطيها صبعي تمصه
المهم اتذوق الطعم وتجرب

وبعد كنت أعطيها بسكويت من ميلوبا..تلعب وتعظظ فيه
تاكل شوي ويلعب في شوي
بعض المرات كنت أعطيها البرطمانات الجاهزه من ماركة Hipp
أنا أحب هذي الماركة لأن اكلها عضوي …ما في كيماويات

الحين هي عمرها 8 شهور ونص…وبصراحة أكثر شي أعطيها من الاكل الجاهز Hipp
لأن فيه خلطات حلوه …ومسواي بطريقة حلوه فيه بهارات خاصة بالاطفال أحنا ما عندنا منها في السوق
وبنتي وااااايد تحبه…خاصة خلطة لازانيا خضروات <<< أكلتها المفضلة
وتحب بعد خلطة معكرونة جبن…أصلا عندهم أشياء حلوة ما تخطر على البال
ولاأعرف أسوي منها في البيت…مثلا سباغتي مع لحم وخضروات
أو دجاج مع روزوتو وجبن…قرنبيط مع ما عرف شو
ولما كنت مسافرة أوربا…حصلت من نفس الماركة خلطة مع سمك ما في مثلها هني
وريلي أصر لازم يشتري منها…ريحة السمك قويه وبنتي مستانسه تاكل
وفيه خلطة طماطم مع شي بنتي تحبها…وأكلهم فيه قطع مب مهروس ناعم
لأن بنتي كبيرة …ولازم تتعلم تمضغ
وبعد عندهم عصير طبيعي…. وناسه
عصير كوكتيل…وعصير تفاح مع كمثرى…وأشياء ما أعرف أسوي مثلها
مثلا العصير…اذا ما قدرت أروح الجمعية واشتريلها …أسوي في البيت
والبيت شو ممكن تسوين غيرعصير البرتقال ( طبعا مخفف بنسبة 1/5)
وأمس حاولت أسويلها أكل في البيت يشبه أكلهم
سلقت كوسا وبطاط وجزر …وهرستهم مع بعض في الخلاط
وسلقت شوي عيش في نفس الماي اللي طبخت الخضرة فيه…وخليته يطبخ لحد ما استوى العيش شوي لين
وحطيته على الخضرة بدون ما أهرسه
المفروض تاكل منه اليوم …بشوف اذا بيعجبها

بعد لاحظت ان بنتي تحب تاكل أكل بنت أختي وهوعبارة عن أرز أطفال على فواكه
قمت يبتلها منه …أرز على فواكه وأرز على خضروات
على أساس أعطيها منه في الليل عشا …أحس به خفيف

المشاركة الأصلية كتبت بواسطة awash828

السلام عليج اختي عوشه

هذي اول مشاركه لي بالمنتدى مع اني من زمان مشتركه بس عيبني موضوعج وحبيت اشارك وإن شاء الله نستفيد من بعض .

انا بنتي شوي وبتدش الرابع , بديت وياها الأكل هذا الأسبوع سويتلها عيش ميلوبا مع الحليب وحطيتله شوي عسل لاني حسيتها ما تقبلته اول شي . عطيتها اياه بكميه بسيطه وخليتها وجبة ما قبل النوم.

هذي بدايتي وياها وإن شاء الله ناويه اجربلها التفاح والكمثرى المهروس لانه رمضان ياي وأكيد الرضاعه بتقل.

والله المستعان .

وعليج السلام حبيبتي… ان شاء الله دوم تشاركين ويانا

فديتج ليش حطيتي عسل مع العيش؟؟ المعروف ان العسل ابدا مش زين للبيبي قبل السنه لأن يحتوي على مواد حيويه وبكتيريا ماتناسب الطفل قبل السنه.. واصلا عيش ميلوبا طعمه حلو.. لا تعودينها فديتج عالسكريات والحلو من الحينه لأنها ماتقبلته مش لطعمه بس لأنه شي يديد عليها..

الله يوفقج ياربي