بنات مشكلة بنت خالتي وهي مشكلة اغلب البنات

بنات انا بدخل في الموضوع على طول , بنت خالتي في ناس ناويين يخطبونها و الريال ما شاء الله عليه جامعي ومن عائله معروفه ويدرس بره , وبنت خالتي متوسطة الجمال بس خلوقه وطيبه وتدرس في الجامعه سنه اولى , راح تقولون وين المشكله اخت الريال قالت حق بنت خالتي نحن نبغي نخطبج ونكلم الابو , بس المشكله في ظروف بنت خالتي ,
1)اول شي هم ناس على قد حالهم وعادي بس هم ساكنين في بيت يدتهم اللي هي ام امهم لان هي لها نصيب في هذاك البيت و زوجها ما يقدر ياخذ بيت ايجار لان الايجارات غاليه ومعاشه ضعيف لانه خليجي,
2)المشكله الثانيه امهم اذا صار اي شي ركض تخبر يدتهم و خالاتهم ويروحون يعلمون الناس ونتوا تدرون امور مثل هاي ما تنقال لين ما كل شي يتم مثل ما قال الرسول واقضوا حوائجكم بالكتمان, لان الناس تحسد ويمكن الشغله ما تتم.
3) اهل امهم ناس ما فيهم سنة عرب يعني اذا احد يا غريب تصدقون ما يضيفونهم شي والله ان بنات خالتي حتى ما يظهرون جدام الاوادم عسب الفشيله يعني يدتي و خالاتي اونه يخافون من الخدامه ( ) و يدتي بيتها عود بس حتى ميلس ما عندهم لا حق الحريم ولا الرياييل و عندهم غرفه شو حلاتها و مخلينا شرات المستودع ويوم نقول عدلوه او خلونا نحن نعدله ما تطيع يقعدونهم في الحوش .

4) الحسد من الاهل: حرمة خالي هنديه كلما شافت شي عند بنت خالتي حلو ويديد تقول اباه عطوني لان بنت خالتي وايد طيبه وعلى نياتها ,على عكس اختها بعد طيبه بس محد يقدر يقص عليها وفوق هذا حرمت خالهم الهنديه تسبهم وتحش فيهم من وراهم جدام الناس , خالتهم يوم بنات خالتي بغو يدخلون الجامعه قالت ليش يدرسون؟ (اتقولون بتدفع من جيبها) وكل كلمه والثانيه تقول انتو عيايز و ما ادري شو وتقول انا صغيره و ربيعاتها اللي كل و حده ولدها طولها و مطلقات تقول اونه كل وحده تحلم ييها هامور عسب ياخذها يالله يوفقهن , حتى مررات تدعي و تقول يالله بنات فلانه ( الجيران او صديقاتها) يعرسون قبل بنات خالتي الثنتين( حضرتها بنات صديقاتها صارن اقرب لها من بنات خواتها) ,بس بنت خالتي مره ردت عليها وقالت لها انتي العيوز عصبت خالتها جان تقول لها طلعي من بيتنا , بس خالتهم دوم تقول متى بتعرسن ؟ عنستن ؟ محد بياخذكن ومن هالكلام عسب يتضايقن وعلى فكره هن بنات خالتي صغار وهي حتى مرات تقول لي انا بعد اول ما ييج واحد لازم توافقين ابد ما ترفضين لانج اذا رفضت معناته انج تحبين واحد انا استويت جي @@ , اتذكر مره ياني واحد وهو اخو صديقتها و كان خريج سجون انا يوم قلت ما اباه احتشرت خاطر ربيعتها , بس من كم من يوم بنت خالتي امهم قالت حق خالتهم والله في ناس يبون يخطبون بنتي وهو دكتور شان ترد خالتي لألألأ هذيله هب اوكي لازم ترفضون بس خلي بنتج تكمل دراستها لاحقين على الزواج, مع ان هي ما تعرف الريال واهله فعلى اي اساس تحكم عليه؟ .

5) الجيران :وهم يزيدون الطين بله طبعا في وحده مصريه عندها جواز ساكنه عدال بيتهم وسمعتها هب اوكي ودوم حش بالناس ودوم تدخل في كل شي وتالف قصص على الاوادم يعني الناس المحترمين ما يتنزلون يدخلونها بيتهم , بس هي من النوع اذا الناس الزينين تشوه سمعتهم واللي شراتها هب اوكي تمدحهم مدح لا صار ولا استوى, و وحده بعد يارتهم هنديه بس عندها جواز طبعا عيالها كلهم فاشلين في الدراسع وعندها بنت عوده لا كملت دراستها ولا مره انخطبت الا مره وحده و الريال غير رايه لان امها طلبت مهر كبير,و السبب الثاني امها ما تعاشر عرب فشقايل راح ييون ناس ويخطبونها ؟ هذا غير ان بنتها هب حلوه والكل يطلع فيها عيب (شرات ما امها تسوي في بنات الناس) مره يت تزور يدتي وعرفت ان بنات خالتي الثنتين في الجامعه شان تعصب وتقول : كيف يقبلونهم في الجامعه وهن هب مواطنات ؟ (ترى الابو خليجي والام مواطنه وهن شاطرات) *, هذا غير مره يت تزورهم فخالتهم تركت الولد عند بنت خالتي وهو كان يسوي حشره , قامت بنت خالتي ودخلته في الغرفه وسارت تسوي حقها عصير, بس الهنديه عصبت وقالت حق ام البنات انا بس ييت ازور امج ما ييت ازوركم و ما ابغي اشرب شي وانتو شليتو الياهل عسب خفتو اني احسده ,بنت خالتي ما دخلت الياهل داخل الغرفه بسبتها دخلته عسب ما يسوي حشره ,بنت خالتي صدق تضايقت , هذا جزاها يوم انها بغت توجب الحرمه ؟ وغيره وغيره…

خواتي بنات خالتي ما علمو احد غير ابوهم و الحين علموني لانهم ما يثقون باحد غيري, بنت خالتي والله تبغي تعرس وتطلع من الظروف اللي عايشه فيه وهي تبغي الريال , بس ما تبغي احد يعرف اي شي لين ما الموضوع يتم , حتى امها الود ودها ما تبغي تقول لها لان هي بس يوم لمحت شان تروح امها وتخبر كل اللي في البيت بس عقب بنت خالتي قالت لا ما في شي بس كلام بس لازم الام تعرف ان في ناس يايين يخطبون البنت , بس هي خايفه ان امها تسير وتعلم كل اللي في البيت واللي في البيت يعلمون الجيران ومثل ما الرسول قال و اقضوا حوائجكم بالكتمان ويمكن الشغله ما تتم (مع ان هي قالت حق امها اكثر من مره لا تعلمين احد بس امها ابد لا حيات لمن تنادي ما تعرف تمسك لسانها) , وهي بعد خايفه من الجيران اذا اهل الريال راحوا يسالون عن اخلاقها يقومون يكذبون على العرب عسب يخلونهم يغيرون رايهم ,والمشكله بنات خالتي واهلهم هب مال مشاكل و في هالزمن الطيب دوم مظلوم . وحتى لو امهم ماتكلمت اكيد راح يعرفون .

بس بغيت اعرف شو صاير بالدنيا ؟ليش الكل يبغي ياذي الثاني؟ ليش الحسد اذا فلانه تقدم لها واحد او دخلت الجامعه يحسدونها ؟ ويقولون ليش هم وليش هب عيالنا ؟اذا وحده دخلت الجامعه وعيالكم فاشلين في الدراسه فاكيد السبب اهمالكم ,اذا وحده ياها نصيبها اسرع ويكون هذا الشخص الكل يتمناه بينما عيالج او انتي ما تقدم لج احد او تزوجتي الشخص الغير مناسب* فهذا نصيبكم , ليش يحاولون يخربون على غيرهم عسب يوقفون نصيب البنت؟ يعني بالطريقه هاي راح يعالجون احساس النقص اللي عندهم ؟ شو اللي بستفيدونه؟ ليش الظلم؟ حسبي الله ونعم الوكيل.

بنات طلب كل وحده تدخل و تدعي ان الله ييسر امور بنت خالتي و يوفقها ويكون الريال هذا من نصيبها ترا هي عانت وايد وعسب جي يمكن رب العالمين يبغي يجازيها و الله انها وايد طيبه وانا اكتب وابكي ما ادري اذاهي دموع فرح لان احس ان اختي الصغيره بتتزوج , او خوف من اللي يمكن يصير.

واذا اي وحده تقدر تعطيني حل او نصيحه يمكن تساعدني في هاي المشكله , او وحده واجهت نفس هالمشاكل او احد من اهلها تخبرني شو سوت , بليز بنات