بنات جامعة الامارات يحدرون

بنزلج كم موضوع كتبتهم عن جامعتنا

^^ بس السكن كبته =)

…………

بسم الله الرحمن الرحيم

السلااااااااااااااااام عليكم ورحمة الله وبركاته

كيفكن صبايا

احم ماشي شباب بهالموضوع سوري اقبضوا الباب

اليلسة بس بيني وبين البنات " بنات السكن خاصة "

احم بداية أحب أعرفكم بنفسي أنا أحلام علي >> لاااااااازم كل مكان هالجملة هههههههههههههههههههه

وبكون معاكم اول اسبوع بإذن الله

أكيد سمعتوا واااااايد عن جامعة الامارات ويلستنا هاااااااي يلسة حش وقرض يلسة حريم بامتياااااااز

شوفوا انا الصراحة واااااااااااايد وايد مستانسة اني بهالجامعة

احسها شي شي

وبقولكم شي ماااااااااااافي مكان كامل

وانا كتبت هالموضوع لاني كنت في يوم من الايام مكانكم وادري تبون تعرفون أكثر وأكثر عن المكان الي بتدرسون فيه

– الحياة في السكن
– النوادي والانشطة
– المصروف
– الباصات

– الحياة في السكن

السكن عموما
في نقطة أحب أذكرها بالبداية
أول ما بتون الجامعة بيكون عندكم نظام الايسبيس ماعرف كيف السبلنق ><
وهو عبارة عن برنامج يحسس الطلبة انهم في بيتهم
وأحلى شي فييه انكم تقدرون تطلبون من المطعم ههههههههههههههه بس بايام محددة ووقت محدد

اول ما بتون بتكونون في سكن توام وهو سكن خااااااااااااص بالمستجدات
هالمكان منفصل عن الجامعة يباله تقريبا 10 دقايق بالباص حتى توصلون الحرم الجامعي
بتكونون فيه كورس او كورسين
اذا انتو من دفعة 2017 ما بتصادفون الا بنات من دفعة 2017 بس يعني لو دخلتي من الكورس الاول بتمين فيه كورسين " الا اذا خلصتي المتطلبات " واذا دخلتي من الكورس الثاني بتكونين فيه كورس واحد , بس حبيت اكتبلكم ان بنات تقنية العين بيكونون معاكم
السكن عبارة عن عدة مباني وفي كل مبنى في كذا طابق
وفكل طابق في غرف وبكل غرفة يا بنتين أو 3 وممكن اتكونين روحج لو عندج شي طبي " يسمونها غرفة خاصة "
لاتتوقعون في الغرفة عندكم حمام ومطبخ
نو نو نو
الحمام والمطبخ مشترك
الا اذا كنتي في غرفة خاصة فيا حظج الصراحة هههههههههههههههههههههه
المطبخ ماشي مايكرويف >< ممكن انتي وربعج بالجناح ممكن تيمعون وتشترون
وماشي جدور ومواعين وهالسوالف
مافيه غير ثلاجة كبيرة وفرن حالته تعيسة شوي احم احم
هم قالوا الكورس الاول قسموا حسب الكليات مادري والله بس اكيد يستوي اتغيرين سكنج ^^ بس في وقت للتنقلات
ولكل مبنى وممكن مبنيين بيكون عندكم مدام هي المسؤولة عن التمام
يعني في وقت محدد " كذا ساعة " لازم تراوين المدام رقعة ويهج عشان تعرف انج موجودة "
وفي بالسكن عيادة في وحدة هندية فنانة سيرو على شفتها يوم رحتلها عشان ايدي قالتلي نايس تيشيرت >> وحدة تحب المديح ههههههههههههه

بقولكم شي عادي تحتاجون وقت لتتأقلمون
انا من النوع الي بسرعة اندمج بس بعد يتني فترة حسيت اني خلاص برد البيت ما ابي اكمل بالجامعة
هالاحساس طبييييييييييييييييييييييييييييعي ولا تخلونه يسيطر عليكم

خلني بقولكم سالفة
دشيت البيت ثاني اسبوع وامي قالت شششششششششش اخوي الصغير كان راقد ماتباني اسوي حشرة >> توني ياية من العين
ولا ادش اختي من وراي واتقول ماما احلام ماتبا اتكمل
وعينكم ماتشوف النور >> شي جي المثل
واتشل الوالدة البيت بصوت تغريدها " صريخها " وقلت ….. ماقلت شي بس صحت هههههههههههههههههههههه

وعطاري الصياح خلني بحش في عمري شوي
اتخيلو مرة شفت صرصور على شبريتي >< سيدة نقزت وميته من الزيغة صرصور صغيييييير
واتصل في ربيعاتي واصيح وحليلهم يو ركض مادرو السالفة سالفة صرصور هههههههههههههه
وليش مايختفي الصرصور وانا ابدا ما انام في حجرة فيها صراصير

راحو ربيعاتي اييبون شي من المطبخ وانا شفته

جااااااااان انا الشجاعة يبت قلاص وحبست الصرصور وحطيت فوق القلاص علبة منكير ههههههههههه
عقب ربيعاتي كملو الواجب

نرد لموضوعنا
اول شهر وحتى شهرين يمكن ماتندمجون عاااااااااادي جدا ^^

بس البنات الي يايين عشان يدرسون وبس فحالتكم صعبة شوي هههههههههههههههه

بالنسبة للبنات

اعرفوا شي
في السكن في وايد بنات من بيئات مختللللللللللفة يعني ممكن تحصلين بنات ما يبلعون ستايلج او مايتقبلون تفكيرج
عادي جدا
بس لاتحكمين عليهم من لبسهم او كلامهم بالمعاشرة بتعرفين هم كيف
انا مثلا ييرانا ماكنت ابلعهم ولا هم يبلعوني خخخخخخخ بس اخر شي كانت علاقتي فيهم اقوى شي
وبنات حجرتج وايد مهم تكونين متفقة وياهم فديت بنت حجرتي انا ^^
واذا خلص الكورس لاتنسين تقولين للمدام انج تبين حجرتج مع بنت حجرتج عشان الكورس الي بعده " هالكلام خاص للي بيدخلون الكورس الاول "
وحبيت اقولكم اتقاسموا الاغراض ويا بنت الحجرة
يعني مثلا انتي ييبي البويلر هي اتييب الكواية جي يعني
انتي حطي 20 كل اسبوع وهي بعد واشتروا اغراض من الجمعية

البويات

ماحبيت اذكر هالنقطة بس اكيد في منكم الي يبا يعرف
هي شي بويات بس مب وااااااااايد الله يهديهم يارب وتراهم بوويات على الخفيف قاصات على اعمارهم هع هع

والحين خلني أرمس عن اللبس
شوفوا اممممممممممممممم عني انا احب البدل
بناطلين وبديات واغلب البنات ثيابهم من زارا استرادا فيريس بريشكا هالمحلات يعني
في بنات يلبسون تنانير ومخاوير ماعرف عني انا احب البناطلين ^^
والبجايم الله يخلي اوشيو ولاسنزا وومن سيكرت وبندو " لحقوا عبندون تنزيلاتهم ظاربة "
بنات انتو براحتكم مب شرط تتقيدون باللي اقوله
بس ترا ممنوع الكت وفوق الركبة فييبو جاكيت وياكم عشان ماتاخذون انذار
وهالكلام حق الي ما يلبسون شيل وعبي ترا في الجامعة بعد حاسبو عاللبس عادي يعطونكم انذار

وفسكن توام دوم يوم تنزلون ييبو شي يغطيكم الباصات شغالة لين الليل ><
وياكثر الهنود الي بتشوفونهم

الازعاج
هههههههههههههههههههههههههه حدث ولا حرج >> المشكلة اني وحدة منهم كح كح

الاكل
في المطعم يكون فاتح باوقات معينة
أكله زين بس أنا مشكلتي مع الأكل مشكلة
فماكان يعيبني اي اكل
وبالاخير اضطر اني اكل اندومي
اقولكم تراكم بتعيشون قصة حب وكراهيه مع الاندومي
والاندومي فنااااااااااااااااتك مع بنات الجامعة
الي يحط فيه ذرة ومعجون طماط وماجي ودنيا وحالة

وشي بنات شادات المهنة يسوون برياني ><
وانصحكم نصيييييييييييييييييحة

رابعوا بنات الرمس من راس الخيمة طبخهم عجيب ههههههههههههههههههههههههههههههههههههه وعليهم طيبة قلب آخ ياقلبي عليهم

والله اشتقتلهم

واهم اهم اهم شي اول ماتون سيرو الجم حافظو على رشاقتكم ماعرف ليش الواحد ينتفخ بالجامعة هههههههههههههههههههه

وعندنا بتوام حوض ^^ يس والنت يوصل لكل مكان تقريبا بس يرفع الضغط

خلصت الي عندي بالنقطة الأولى
بس بنصحكم حاسبوا على اغراضكم عن تنسرق

………………………………

المصروف

وايد بنات مايعرفون كم يودون
لو انتي وحدة تعرفين تسوين كنترول عدل عدل 100 بتسدج
واذا ماتعرفين فخلج وياي
انا اسبوعيًا اصرف 150
غداي 3 مرات في الاي تي " أغلى مكان " عشرين درهم 20 * 3 = 60 , ومرتين في مبنى 80 يستوي 11*2=22
يعني أكلي 82
الجمعية بس 10 " حق الماي " لاني اشتري كل شي من جمعيتنا الي في اماراتنا كل شي موجود وارخص
10 للدارلنق " العاملة " عشان اتشل اغراضي يوم اتكون عندي وايد اغراض ومرات ازيدها 15 لو شي ثجيل
والباقي يوم نطلب من بره
والرصيد خسي ما احط كل مرة اتصل في حد من الاهل يطرشولي هههههههههههههههههههه

اوكي ها الي أصرفه بس أنصحكم حطو احتياط 200 درهم ل 500 انتي وميزانيتج , هاي الله يسلمكم عشان لو ظاعت بيزاتكم او في دورة وحبيتوا تشتركون لان الدورات مرات ببيزات ولا سوو معرض في الجامعة وبغيتو تشترون اشيا
في دورات واااااااايد ببلاش بس بعد في دورات ب 25 وب 100 و200 وممكن تصك الالف
وانصحكم بنصيحة
ترا بداية كل سنة ينزلون أسهم يبدون ب 30 ل 900 درهم > أسهم الجمعية
انصحكم انصحكم انصحكم تشتركون فيها لانها ادخل ربح حلو
اختي " مشتركة ب 900 " أول سنة نزلها ربح 1600 ثاني سنة 900 صح الرب مش ثابت بس يظل ربح وراس مالج محفوووووووظ

– النوادي والنشاطات

ما شا الله عندنا نوادي وااااااااايده وفعالياتهم جدااااااااا رائعة
في الاتحاد الوطني وصناع الحياة ونادي ساكورا ونادي كوري وواااااااااااايد اشيا تجنن
هم بيشرحولكم عن نفسهم ان شا الله
وحتى الكليات ل كلية لها انشطة رووووووووووعة ودورات فنننننننتك
وادارة الانشطة ماتقصر بالفعاليات
بتحسون من كثر الاشيا بتضيعوووووووووون
فانصحكم تخلون معاكم كلندر وتعبونه
وبراويكم صورة كلندري
اتكاسل اسويلكم كلندر >< خخخخخخخخ منو بتتبرع تسويلنا

بس بقولكم الدورات الي اسوت عندنا " هييل نقطة في بحر "
– دورة قيادة الذات للدكتور بشير الرشيدي " مجانية ولها معايير خاصة لاختيار الطلبة "
– دورة عقلية البطل والقدرات الخفية للدكتور ناصر العامري " ب 500 للطلاب والبقية 1000 "
– دورة الاتيكيت " ماعرف بكم "
– دورة المكياج " 250 " وشهادتها معترف فيها
– دورة انماط الشخصية ب 25
– دورة الشعر مجانية
………….

خلوني انتقل لآخر نقطة عندي

الباصات

اهم اهم اهم شي احترمو راع الباص
جد في بنات مابي اقول لكن جد فيهم قلة ادب يرمسون راع الباص جنه شغال عندهم
شوفو
اذا الكلاس مثلا 8 نشو وخلصو و7 سيروا افطروا بالمطعم 7 ونص وقبل خلكم صوب الباصات
مو تروحون الباص 7 و45 دقيقة

يمكن تتأخرون
واذا اتاخرتوا اكثر عن 5 دقايق بتعتبرون غياب
الجامعة كبيرة وبين فترة وفترة بتحصلون باصات تفرفر بالجامعة لو انتو ماتحبون المشي

الباصات في كل امارة لها وقت انطلاق يختلف من امارة لثانية ممكن اتشوفون المكان في موقع مرحبا الساع

بنات الشارجة لا تروحون بسيايير تعالو وياي بكون في الباص بندق سوالف
وبنشوف فلم ورا

من الحين احجزوا سيتاتكم ماشي غير حق 4 بنات ورا عشان نطالع الفلم ههههههههههههههه
والبنات الباقيات ييبو لبن اب عشان نثلجه وناكله
وبنستاتس في اول اسبوع واااااااايد بإذن الله
الي تبا تتواصل وياي حياها على الخاص
ولاتستحون مني
واي شي اي شي في خاطركم قوليلي ان شا الله شي ما يخصه بالجامعة

اي نقطة حابين نرمس عنها انا وخاتكم موجودين

أعضاء تابعونا يمكن نذكر شي يفيدكم

همسة : لاتنسوني خواتي من دعوة في ظهر الغيب الله يهدينا ويهديكم

أحلام علي

للرفع

هلا ح ياتي

انتي فديتج بتكونين ف سكن المستجدات فلا اتخالطين بنات الي قبلج

خلج ويا ربيعاتج

ولا ترابعين حد رقم تلفونج لاتعطينه حد

واظن انكم ف السكن بتتلاقون فما يحتاي