بنات انا متضايقه وايد والسبب .

السلام عليكم ورحمة الله وبركاته
هلا خواتي الغاليات

الصراحه بنات انا متضايقه وايد والسبب اني للحين ماحصلت الصديقه اللي تفهمني وتشاركني افراحي واحزاني .. انا الحمدالله متزوجه وزوجي يحبني وانا احبه والحمدالله هو مب مقصر علي في شي .

بس دايما احس بضيق يوم اتذكر صديقاتي انا بقولكم كل شي بالتفصيل واتمنى القى منكم القلب الوسيع اللي يسمعني ويحس فيني .

كانت عندي صديقه من ايام الدراسه وكنا دايما مع بعض ومول مانستغني عن بعض يعني مكالمات واتصالات بس للاسف بعد فتره اكتشفت انها تجذب وايد الله يهديها يعني كانت تقولي وايد اشياء عنها بس كلها جذب في جذب واللي كشف لي جذبها اهي نفسها تقولي شي وتنسى انها قايلتلي قبل شي ثاني ومرات تقولي اشياء مادش العقل و ماتتصدق ولهذا السبب انا ابتعدت عنها وصارت مكالماتي لها قليله جدا وصرت حتى ما اثق فيها

المهم وفي شهر سبعه سافرت مع زوجي دوله أجنبيه ويلست هناك تقريبا أربع شهور وتعرفت على بنات بعضهم من الامارات وبعضهم من دول الخليج بس في 2 حبيتهم مثل ما أحب خواتي وحده من الامارات والثانيه سعوديه وكنت دايما ايلس وياهم ونسولف ونظحك وخذنا أرقام بعض على اساس اذا رجعنا لبلاد نتواصل . المهم البنت الاماراتيه رجعت مع زوجها قبلي . والله يا بنات اني يوم كنت اودعها هناك كنت احس اني اودع اختي والله العظيم اني حزنت على فراقها المهم بعد مارجعت هي طرشتلي مسج تسأل عني وتطمن وانا طبعا رديت عليها وكنت متشوقه ارجع لبلاد علشان اتصل فيها وشوفها المهم بعد فتره رجعت لبلاد واول مارجعت اتصلت فيها بس ماردت علي طرشت لها مسجات وخبرتها اني وصلت لبلاد وبعد ماردت ونفس الشي البنت السعوديه اتصلت فيها وطرشت لها مسج اسأل عنها وبعد ماردت عاد هاذي لليوم ماردت علي ولا كلفت نفسها تتصل وتسأل .. الصراحه ساعتها حسيت بحزن كبير .. المهم بعد فتره وانا بأحد المراكز التجاريه مع زوجي شفت صديقتي الاماراتيه مع زوجها وسرت سلمت عليها والله العظيم ما تتخيلون اشكثر فرحت لاني كنت احاتيها يوم ما كانت اترد علي ونسيت تطنيشها لي المهم سألتها وينج ليش مارديتي على اتصالاتي قالتلي اسمحيلي الصراحه متلومه فيج كنت وايد مشغوله وطلعت لي اعذار بس كانت اتسولف وتظحك وياي ولا كان باين عليها انها ماتبا صداقتي او شي من ها القبيل المهم يوم ييت اودعها قالتلي ان شاءالله بتصل فيج ولا اتصلت بس طرشتلي كم مسج وانا طبعا رديت على مسجاتها لاني ماحب اطنش حد. وبعد فتره طويله اتصلت وسولفت وياي ومن بعدها مارجعت اتصلت واذا اتصلتلها ماترد والله مستغربه من ها الانسانه هي تبا صداقتنا تستمر ولالا؟ والله العظيم يا بنات اني حبيتها مثل أختي لاني حسيت اطباعها نفسي هاديه وايد وانسانه ملتزمه نفسي الحمدالله بس مادري شو سبب التطنيش؟ والله يا بنات اني يوم تعرفت عليها فرحت وايد قلت اخيرا حصلت الانسانه اللي تفهمني وافهمها لانا كنا نيلس بالساعات نسولف ونظحك بس من رجعنا كل شي تغير.؟
وعندي غير ها الصديقه كم وحده بس بعد نفس الحال مايتصلون ولا يسألون الا نادر جدا كله انا اللي اتصل وسأل انا الحمدالله مانسى ربعي بس هم مادري اشبلاهم جذيه ..
انا الحمدالله انسانه ملتزمه ودمي خفيف وطيبه ومب ناقصني شي هذا بشهادة الجميع بس مادري ليش للحين مالقيت الصديقه اللي أثق فيها. حتى خواتي اللي هم خواتي احسهم بعيد عني دايما انا اللي اتصل وانا اللي اسأل هم مايتصلون الا اذا صارت عندهم مشكله يدورون المنقذه اللي هي انا علشان اساعدهم وحتى اذا صارلي شي حلو وتصلت ابا افرحهم وياي مايعطوني ويه ويكلموني بكل برود وكأن ها الشي ما يهمهم والله يا بنات دايما خاطري مكسور من توفت امي وانا هذا حالي أمي الوحيده اللي كانت تفهمني وكانت تسولف وياي وتاخذ مابخاطري الله يرحمها ويغفرلها ويجمعني وياها وجميع المسلمين في جنة الفردوس اللهم آمين… اسمحولي ادري اني طولت عليكم بس والله ماكتبت ها الكلام الا من الضيق اللي في قلبي لاني مب محصله حد يفهمني …. أكيد بتقولولي انزين تكلمي ويا زوجج بقولكم مب كل شي ينقال حق الزوج يعني في شي ينقال وشي ما ينقال حق الزوج مثل مواضيع المكياج ولكريمات والشعر واللبس ماتنقال حق الزوج هاذي سوالف بنات لان الرياييل مايفهمون في ها الامور وللاسف مب محصله ها البنات اللي اتكلم معاهم في ها الاشياء لاني انا احب ها الاشياء موووووووووووووت احب اهتم من نفسي واشتري كريمات ومكياج بس ابا حد يشاركني اهتماماتي بس مب محصله .