بعطيكمـ شوي من خبرتي ونصائح المدرسين لإمتحان IELTS

مرحبا خواتي ..

بغيت افيدكمـ شوي باللي اعرفه واللي كانو ينصحونا فيه مدرسين الجامعه لإمتحان الآيلس ..

وان شاء الله بسهوله تيبين براند 5 او 5,5 في الاكاديميك

في الـ Listening :

حاولي قد ماتقدرين ماتخلين ولا فراغ واحد , حتى لو انتي شاكه بالاجابه ..

وحتى لو كنتي شاكه الـ Spelling انه غلط بعد .. اكتبيه ..

ماتعرفين يمكن تطلع الاجابه الصحيحه ..

في الـ Reading :

اول شي خذي نظرة سريعه ع الثلاث مقالات واسئلتهم ..

وعقب اختاري بتقدريج اسهل اثنين وحليهم عدل ..

ولو فرضنا واحد منهم حسيتي انه صعب شوي ..

خليه فاضي ع طوول سيري للمقال الثالث ..

وبقولكمـ نصيحه المدرسين وصدق حسيت فادتني وفادت وايد بنات غيري ..

لو ماعندج وقت او مافهمتي شي من الاسئلة ..

في الاختيارات يكون عندج A , B , C , D

حطي ع طول كلهم B .. لأنه غالباً B تكون هي الاجابه الصحيحه ..

وفي اسئلة الصح والغلط ..

حطي كلهم True

في الـ Writing :

لا تقولين صعب ومافهمت شي .. اكتبي اي شي تعرفينه ..

حاولي في 5 دقايق اول اقل تسوين مخطط بسيط عن شو بتكتبين ..

بس ركزي اكثر عن ع Task 2 .. لأنه عليه درجات اكثر من Task 1

طبعا لازم قبلها بفترة تاخذين فكره عامه ع طريقة الكتابة ..

من المواقع او الكتاب اللي بنصحكمـ فيه في اخر الموضوع ..

في الـ Speaking:

اهم شي تكونين واثقه ويكون صوتج مسموع ..

لا تستحين .. بالعكس بيني لهم انج تعرفين ترمسين .. حتى لو غلط

تخيلو في امتحاني .. في Task 2 لازم اكتب نوتز وعقب ارمس ..

ماعرفت شو اكتب لأني مافهمت الموضوع عدل .. ويوم قالت لي ارمسي ..

قلت اللي اعرفه ..

من اني كنت متوقعه اني برسب خلاص بس يبت فيه 5 ونفس الشي في المره الاولى ..

ثرثري وتفلسفي ع كيفج .. المهم ترمسين وايد .. يحبون هالنوعيه ترا ..

وانصحكمـ بكتاب اسمه Focus on IELTS Foundation Level

ماعرف كم سعره الصراحه .. بس الجامعه اعطونا اياه و وايد استفدت منه ..

بس اتوقع ينباع في المكتبات الكبيرة ..

بما اني كنت ماخذه موضوع امتحان الآيلس it is Easy لوول .. قريت وتصفحت الكتاب كامل قبلها بيوم او يومين بس ..

ع فكره ..

في المرتين اللي امتحنت فيهم ,

الموضوعات الـ Speaking اللي اعطوني اياه .. تبين لي من الكتاب ..

الكتاب الصراحه مافيه حقه .. يعلمج كيف تاكدين موضوع .. وكيف ترفضين ..

وكيف تطلبين ان يعطيج وقت للتفكير في الاجابه .. باسلوب لبق ومب تقليدي ..

يعطيج ع طريق جمل يفضل انج تحفظينها ..

وبعد فادني في Writing ..

اما بخصوص Vocabulary ( الكلمات ) ..

فيه كلمات مفيده بس كنت اعرف اغلبهم فكنت مطنشه الفوكاب ..

وانصحكمـ بعد تمتحنون في كلية التقنية في بوظبي ( فرع الشباب ) ..

القاعه هناك صغيره والصوت في الـ Listening مسموع و واايد واضح ..

هاللي انا لاحظته الصراحه مقارنه مع الجامعه ..

ان شاء الله تكونون استفدتو ولو بشي بسيط من موضوعي ..

دعواتكمــ لي ولأختي ..

اختكمـ AD Classic