المصروف الشهري والتوفير

السلام عليكم ورحمة الله وبركاته …

شخباركم بنات …

اليوم خطر على بالي موضوع المصروف الشهري والتوفير…
طبعا اكيد الاغلبية منا تحب الصرف واحيانا ما تقدر تتحكم في مشترياتها ..
تسير السوق وادش اغلب المحلات …
وتشتري اشياء بتهور.. واشياء يمكن ما تحتاجها… واشياء تمزر الكبت فقط .. و
وايي نصف الشهر او قبل والمصروف خلص .. وتتأزم البنت وتكره حياتها فجاة خخخخخ..
خلونا نناقش بعض الافكار اللي ممكن تساعدنا على التوفير والتحكم بالفلوس بدون هوس…

أفكاري :

فكرة الظرف : للبنات اللي يستلمن المصروف كاش ..

اتحط المبلغ في ظرف وتحطه في الخزنة وتكتب على الظرف :"مصروفي" وعلى كل طلعة او كل فترة تاخذ منه على قد حاجتها ..ممكن تقسم المبلغ على مدة الشهر .. مع وضع مبلغ بسيط للتوفير من هالمصروف قي ظرف آخر… نكتب عليه توفير فقط .. وما نسحب منه الا للحاجة .. مثلا اذا كان مصروفها 2024 درهم ..
الاسبوع الأول : 500
الاسبوع الثاني: 500
الاسبوع الثالث: 500
الاسبوع الرابع : 300
200 توفير..

طبعا المبلغ اللي في حقيبتج بيخليج تحددين أولوياتج .. وبيخليج تفكرين قبل ما تشترين ..
ممكن تغيرين التقسيم بطريقة اخرى تناسب احتياجاتج …

طبعا البنات اللي يستلمن المصروف في بطاقة ..

ممكن تطبقين نفس الفكرة وتسحبيلج كل بداية اسبوع مبلغ معين .. وبعد ما تسحبين تخلين بطاقتج في الخزنة عشان ما تردين تسجبين مرة ثانية لين الاسبوع الثاني …هالفكرة بتخليج تقيدين عمرج بملغ معين …

الفكرة الثانية : فكرة الحصالة
حصالات دايسو تأدي الغرض .. خذي اكبر قياس ..وحطيهاعلى الميز تواليت وكل فترة حطي فيها انواط وريالات … 10-20-50 درهم او حتى 100 لين ما تنترس بتكونين وفرتيلج مبلغ حلو …. فكرة حلوة الصراحة ..
والحصالة هاي ما تحلل البيزات عن تجربة ..

الفكرة الثالثة : الجمعية
طبعا اغلبكم يعرف هالفكرة ..
تشتركين في جمعية لمدة عشر شهور مثلا …

بمبلغ يناسب ظروفج .. ويوم بتستلمين الفلوس حاولي انه المبلغ يستغل لاشياء مفيدة وأنا احبذ ان المبلغ يتوفر…
وايد أوؤمن بفكرة … القرش الابيض لليوم الاسود .. لازم يكون في مبلغ للتوفير.. سبحان الله االواحد ما يعرف شو الظروف اللي بتستويله عقب …وعشان ما يحتاج انه يطلب من الناس..

الفكرة الرابعة .. جدول الشهر…

افتحي صفحة في الاكسل او الوورد ..
وضعي لستة بالاشهر .. وقسمي احتياجاتج ودوني على شو صرفتي فلوسج ..مع كتابة مبلغ التوفير الموجود عندج..

الفكرة الخامسة .. فتح حساب توفير
تحطين فيه مبلغ معين كل فترة وما ينسحب منه اي شي…

طبعا هاي الفكرة ممكن تتطبق على الاطفال بعد …
نفتح لكل طفل حساب خاص .. ونحط لهم فيه مبلغ رمزي كل شهر مع العيدية وهالاشياء

…اه تعبت … هاللي في بالي الحين …
اتريا آرائكم ..

دمتم بحب