تخطى إلى المحتوى
الرئيسية » >>اللي عندها خلفيه عن البيبيات القاصرين تساعدني>>

>>اللي عندها خلفيه عن البيبيات القاصرين تساعدني>>

بسم الله الرحمان الرحيمو الصلاة و السلام على أشرف المرسليننبينا محمد صلى الله عليه وسلم

السلام عليكم ..
حبيت اعرض عليكم حالتي بعد الولاده ..انا ولدت ويبت بنت والحمد لله لكن ولدتها ناقصه تقريبا 35 اسبوع وتمت عندهم فالكورنيش تقريبا اسبوعين لانها صغيره وزنها كان كيلو و800 غرام وماكانت تعرف ترضع لانها صغيره بس الحمد لله ماعندها مشاكل ثانيه بس مسألة الرضاعه وكنت احاول اروح ارضعها لاني تميت فلامستشفى عندها .. وطبعا اظطريت اشفط لها الحليب من صدري وهم يعطونها مرة بتيوب ومرة بمرظعه ومرة يشربونها ومرات نادرة كانت ترضع مني ..وكان فيه حليب الحمدلله …وطلعنا وخذت الحليب مالي اللي فيي المستشفى كان مثلج وتميت استخدمه اذوبه واعطيها في مرضعه 50مل و 60مل وارضعها اذا مسكت
واشفط لها بس اول ما طلعت الحليب خف لدرجه فظيعه ولاجنه فيه حليب عكس المستشفى معني اكلي زين وبالغصب اطلع من الاثنين 60 مل.. فاظطريت اعطيها حليب مساند وعطيتها سيميلاك 1 والحمدلله خذته والحين هي شهر و4 ايام وزنها تقريبا كيلوين ونص واعطيها ماي ونبات ومرات ينسون ومرظعه جاي مللووبا.. بس خايفه عليها انا خاطري ارضعها بس هي ماتمسكت واستخدمت البلاستيكه اللي نحطها عالحلمه عسب تساعد البيبي عالمص وفادتني ومرات اتكون هي ومرات لأ..
الحين انا اعطيها كل 3ساعات مرضعه 60مل ويمكن مرة او مرتين فاليوم ترضع مني وماتكون رضاعتها كامله .. اخاف تودر صدري وبعدين الحليب يقل بشكل سريع لانها ماترضع مني وهل بيأثر عليها انها خلاص تاخذ صناعي وهل افطمها من الحين لانها ماترضع اصلن ؟؟
وسمعت ان اليهال الي ناقصين مايتقبلون الاكل فالمستقبل وحساسين وايد .. انا محتاره وياها اباها تكبر لانها صغيره وايد .. واباها تمتن باي طريقه..؟؟
وبعد سمعت ان االحرمه اذا مارظعت البيبي الاول ماييها حليب فالبيبي الثاني؟؟
اتمنى حد ينصحني ويرد علي ..
السموحه

الوسوم:

6 أفكار بشأن “>>اللي عندها خلفيه عن البيبيات القاصرين تساعدني>>”

  1. kholoud
    الرد

    هلا اختي
    انا بقولك تجربتي انا عندي توئم ولدتهم وكان لي 6 شهور ونص وجلسو بالحضانة شهرين بالضبط اوكي وكنت ما اقدر ارضعهم مباشره كنت اشفط واعطيهم بس كان مايطلع الحليب بكثره ويوم سالت دكتوري قالي لانك ماكملتي الين الشهر التاسع ويوم طلعوا كنت استخدم حليب السميلاك نيوشورز حق الاطفال ناقصين النمو ومن يومها ماعاد اعطيهم صدري وكبروا الحمد لله بس الي يشوفهم ويشوف الاطفال الي والدين وهم كاملين غير عن بعضهم بس لا تخافين ولا تقلقين ترى عادي بتكبر وبتاكل وبتشوفينها عروس ان شاء الله

    والله يخلي لك بنوتك ياااارب

  2. كلثوم
    الرد

    مشكورة اختي ع الرد .,
    بس خوفتيني كيف يعني يكون في فرق بينهم وبين البيبيات الكاملين من اي ناحيه ..؟؟

    انا احس بنتي صغيره وايد راسها صغير .. اخاف انها ماتكبر والله

  3. كوثر
    الرد

    حبيبتي انا بعد يبت بنتي في السابع وكنت اشفطلها لامها ما اتروم اتمص لانه كان عندها مشاكل في التنفس تميت اشفطلها مدة شهرين ونشف صدري وفي المستشفى بدو يعطونها حليب سميلاك نيوشور وبعدين يوم كملت 4 اشهر في الكورنيش غدة بخير وطلع وبعدين بديت اعطيها سميلاك 1
    الحين بنتي كملت يوم الخميس 3 سنوات والله ماشاءالله الي يشوفها يقول 4 سنين والله حتى ماشاءالله اشتريلها ملابس بو 4 سنوات لانها تنبان اكبر من عمرها
    واذا خايفه من التعلم او المشي هي بدت تمشي يوم كملت سنه واربع شهور والحين ما اروم اركض وراها ماشاء الله ولسانها يلط اذانها طويييييل وملسونه فديتها
    حبيبتي انا انصحج روحي عن دكتور على هنداوي وااايد ممتاز وبيفهمج و بيجاوب كل اسالتج وبيطمن قلبج
    اسم عيادته عيادة الدكتور على الهنداوي موجوده في بناية طيران الاتحدا الي صوب مدينة زااايد
    روحيله وسوي الي قلته وبتدعيلي انشاءالله بالخير

  4. hanan
    الرد

    صباح الخير أختي

    لا تخافين ولا تحاتين أنا ربيت في السابع وتم ولدي في المستشفى تقريباً أسبوعين وكنت كل يوم أسير أرضعه ويوم طلع بالسلامة رضعته من صدري فترة وبعدين خف الحليب وعطيته حليب ثاني والحمدلله والشكر لله ألحين عمرة سنة وست شهور وبصحة وعافية وإنشاء الله بنتج بتكبر وبتشوفينها عروس .. بس لا تحاتين دايماً الخدج ايكون حجمهم صغير بالنسبة للي مولودين في التاسع بس هالشي عادي ما يأثر عليهم الحمد لله والمفروض تحسبين عمرها من وقت الولادة يعني أنا ولدي مولود في السابع فهو أقل من سنه بشهرين يعني إذا هو ألحين عمره سنه وست شهور معناته عمره الصحيح سنه وأربع شهور تقريباً وبتلاحظين هالشي من تصرفاتهم والحمدلله طبعاً ياكل عادي حاله حال الباقين لا تسمعين الخرابيط اللي تنقال لأنه الأطفال الخدج طبيعين مثل الأطفال العاديين بس هم مولودين قبل موعدهم ومادم بنتج بسم الله عليها بصحة وعافية لاتحاتين ولا تخافين أختي الغالية وأي استفسار أنا حاظرة

  5. إخلاص
    الرد

    الغاليه انتي نفسي انا ولادت ف الشهر الثاامن بالاسبووع ال35 ..

    ونفس الحاله تم ولدي عندهم 12 يووم وهو بالشيشه والتنفس عنده 100 وشي وكانوا يعطونه حليب بالغصب بس لما طلعته من المستشفى بديت اهتم فيه والحين عمره 6 شهوور بس مالله مب ذااااك الياابس هههههه الحين صااار رياال اذاتبغين الطريقه كيف صاار جي بخبرج رااسليني ع الخاااص مافيني يصكونه بعين هههههه ..

    فديتج والله اي شي تبغين انا حااضر ..

  6. سندس
    الرد

    هلاااااا فديتج ما شاء الأغلب مربيات في الكورنيش…….. انا يبت ما شاء الله توأم بنات ووحده كان وزنها ناقص 1600غرام وقعدت في المستشفى 10 ايام الين مايزيد وزنها و ما كان فيني حليب وايد فكنت اعطيهم سميلاك نيوشور وعقب بشهر خف الحليب من صدري الين ما وقف ورضعتهم عقب من الحليب الصناعي لمده ثلاث اشهر عقبة غيرت لسميلاك ادفانس والحين عمرهم 6 اشهر وماشاء الله عليهم وحده صحتهم زينة ووحده كبيرة والثانية صغيرة بي اوزانهم في الحد الطبيعي وماشاء الله عليهن ياكلن عدل…… الله يخليهم لي و الله يباركلج في بنتج.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.