" العيش البنفسجي بالدجاج " طبق مميز

السلام عليكم

شحاالكم؟

هذا طبق سهل و سريع .. و مميز..

اللي بيشوف لون العيش بيقول ..مم كيف طعمه ؟؟ بس هو نفس العيش الابيض العادي..لكن بلون مختلف..

بخليكم مع المقادير و الصور ..

مقادير العيش:

-2 كوب عيش.

-نص حبة ملفوف بنفسجي مقطع شرائح.

-2 لتر ماي.

-مكعب ماجي دجاج.

-ملح.

-شوي من ماي الدجاج.

نفور الملفوف في الماي لين يصبغ الماي بنفسجي و يبهت لون الملفوف.

نصفي الماي..

و نحط 5 أكواب منه في جدر ثاني .. لين يفور ..طبعا العيش مغسول و مودن في ماي و مجهز ..

من يفور الماي حطيت العيش و الملح و الماجي و ماي الدجاج..

و جي انتهينا من العيش ..

ألحين حشوة الدجاج..

المقادير:

-2 صدر دجاج مفور و مقطع مكعبات..( لا تنسين ان نبا من ماي الدياي للعيش)

-1كوب بصل شرائح.

-ثوم مهروس.

-زنجبيل مهروس.

-جزر عيدان .. و ممكن تضيفين فلفل بارد عيدان .. بس انا ماحبه.

-مكعب ماجي دجاج.

-2 او 3 ملعقة طعام أجار مانجو مهروس.

-بهارات حسب الرغبه( ملح-فلفل-كاري-كمون-بهارات مخلوطه او بزار)

هذي صوره توضح المقادير..

نحمر البصل عالضو و نضيف الثوم و الزنجبيل..و الماجي..و عقب نضيف الجزر..والدجاج..و البهارات..و الأجار آخر شي..

و هذي النتيجه النهائيه ..انا حطيت شوي من الأجار فوق الدجاج..

ملاحظه: هذي المقادير ل3-4 أشخاص بس..ممكن تضاعفين الكميه..

هني و عافيه