السفر الى تركيا

بالتوفيق

المشاركة الأصلية كتبت بواسطة "فلونه"

مررررحبا اختي
انا من عشاق تركيا … وصدقيني ما راح تندمين لو زرتيها ..
ع كثر سفراتي .. تركيا غييييييييييييييير حسيت بالمتعه فيها واايد ،،
أول سفره لي كانت مع ريلي وعيالي (رضيعه عمرها شهر وطفل عمره سنتين ونص ) وبصرااااحه استانسنا وااااايد حتى ولدي مع انه صغير بس كان مستانس
والسفره الثانيه لي كانت مع اهلي قبل 4 أيام راجعه منها … وبعد كانت رحله ممتعه …
راح أخبرج عن كل شي : عن نفسي السفره الاولى ما خسرت شي فما أعرف التكاليف بالضبط كم كانت لانه زوجي يطول بعمره ما قصر
السفره الثانيه بما اني رايحه بدونه فكانت الميزانيه عندي … كانت التكاليف متضمنه التذاكر + الفنادق + المواصلات + الصرفيه = تقريباً 12 ألف درهم اماراتي..
اللي أكثر شي خسرني الأكل لأنه أكلهم شوي غالي كانت الوجبه الوحده تقريباً تكلف مش أقل عن 200 درهم بفلوسنا ..
… وكامل المواصلات لمدة 8 أيام مع رحلة بورصه لانه بورصه السايره تكون معاج فالباخره مع توصيل من وإلى المطار.. … فتكلفة المواصلات كانت 1900 دولار = تقريبا 7000 درهم وبما إني كنت مع قروب رايحه فالمواصلات كانت مقسمه ما بينا .. والسايق اللي حاجزين يكون مخصص لج طول اليوم من الصبح ليييين الليل .. أو بالاصح لين انتي ترخصينه يروح فالليل ع الساعه اللي انتي تبينها … وتتواعدين معاه الصبح ع الساعه كم يكون متواجد ..

بالنسبه للفنادق … أنصحج في بوكينج .. وكانت اختي يزاها الله خير هي مرتبه لنا الفنادق … فنادق منطقة السلطان أحمد غرفهم ضييييييييييقه … وراح تنصدمين منها يوم توصلين بتشوفين الصوره شي والواقع شي .. لكن تحملي هي بس للمبيت .. لأنه كل الفنادق في منطقة السلطان احمد بهذي الوسع ما راح تلقين أوسع مثل ما متعوده في الفنادق الثانيه ..لانه حسب ما قالولي انه الحكومه تريد تحافظ على طراز المباني القديمة فمش مسموح بعمل توسعه للمباني عندهم …
سكنت في 3 فنادق وكانت كالتالي : اسطنبول فندق سيبتيمام لمدة 5 ايام = 938.87 درهم – بورصه فندق بيوجازل شي جي اسمه خخخ المهم لمدة ليلتين = 545.30 درهم- اسطنبول لمدة ليلة في فندق اميرالد = 1804.24 درهم

بالنسبة للجو : انا رايحه من تاريخ 1-8/12 بررررررررررررررررررد .. درجة الحراره تتراويح ما بين 10 -1 درجة سيليزيه .. وطبعااً بووورصه أبررررد عن اسطنبول درجة الحراره 5 وتحت .. وفوق جبل أولدووج المنطقه بيييضاااء مغطااااية بالثلوووووووووووج تحت الصفر الحراره …وأمطار عندهم ..
وبما انج مسافره في شهر 3 أعتقد الجو راح يبدأ يعتدل والبروده تقل … وتقدرين تشيكين أفضلج على درجة الحراره من مواقع متعلقة بالطقس ..

بالنسبة للأماكن راح أكتبها لج مثل ما نحن زرناها بحسب تقارب الاماكن من بعضها علشان تكسبون وقت وما تضيعونه في بعد المسافات .. وخاصه انه واايد زحمه عندهم ..
أول يوم – منطقة السلطان أحمد : مسجد السلطان أحمد ، آيا صوفيا، توب كابي .. وأنصحج بجوتي فلات لانه بتمشين وااااايد ><
ثاني يوم – الأكواريوم – بانوراما توب كابي – منطقه مرتفعه فيها مطاهم للشاي وجلسات مطله على بحر مرمره ( بالتركي يسمونه حسب ما قالنا الدريول بورتريه )
ثالث يوم : جزر الأميرات وتحتاج يوم كامل من الصبح لين المغرب تقريباَ
اليوم الرابع: ميني ترك – قصر دولما بهجة قصرررر ولا أرووع أنصحج بزياارته هو بالذااات .
اليوم الخامس : الذهاب إلى بورصة وفي الطريج تقدرون تمرون على شلالات يلوا
اليوم السادس: جبل أولدوج بالتلفريك .. أو بالسياره لانه على حظنا التلفريك كان في صيانه فرحنا بالسيارة ، مكان اسمه تشلر عند الشجرة التاريخيه الكبيره
اليوم السابع : شلالات بورصه مكان رووعه وكله مطاعم تقدرون تتغدون فيه وترجعون على اسطنبول .
اليوم الثامن : اسطنبول منطقة تقسيم ,, يوم للتسوق قبل السفر ،،، طبعاً نحن كان التسوق يومياً عندنا ^_^ تعرفين حريييم من نرجع وقت على طوول قلنا للسايق بزار ههههه ما نطوف ولا دقيقه خخخ .. وترا سوقهم يسكر بسرعه ع الساعه 8 تقريبا مسكرين اغلب المحلات ..
بامكانكم تروحون رحله على الباخره في البفسفور ..

هذا كل اللي عندي أتمنى أفدتج وأي استفسار انا حاضرة …

كلامها روووووووووووووووووووووووووووووووعه

بس نصيحه لاتروحين جزيرة الاميرات مب شي

اوريدي المناظر كل مكان احس رحنا عالفاضي

قعدنا بعربه وجرتنا الخيول والريحه خااااااااايسه لان يحطون شي تحت الحصان عشان الفضلات عزج الله