الخلايا الجذعية

السلام عليكم خواتي

لازم وانتي حامل تسجلين وفي الغالب تدفعين 3.000 درهم وبيعطونج علبة او كرتون بعد ماتسجلين بياناتج، تحتفظين فيها وتاخذينها معاج وقت الولادة (يعني خليها مع شنطة المستشفى عشان ماتنسين)

وفي غرفة الولادة بعد مايطلع البيبي ويقطعون الحبل السري اللي بتولدج بتاخذ دم الحبل السري وبتجهزه لج وترجعه في الكرتون وعلى طول اتصلي بالمندوب او المندوبة يستلمون الكرتون اللي فيه دم الحبل السري

وبعد كم اسبوع بعد ماتطلع نتائج تحليل الدم ويكون صالح للتخزين تدفعين باقي فلوسهم حوالي 9.000 درهم

الشركات كثيرة في دبي ويكون التخزين في بريطانيا في بنوك خاصة بالخلايا الجذعية، ماعليج اللا تروحين المستشفى وتاخذين الكتيبات المتوفرة وتقرينهم عدل بعدين تقررين اي شركة تتعاملين معاها

بعضهم يخزن في مكانين في بريطانيا عشان لو سار تلف في مكان يكون المكان ثاني متوفر
وبعضهم يخزن دم الحبل السري وبعد قطعة من الحبل السري حوالي 15 سم لكن سعرهم اغلى
وارخص شي اللي يخزن بس دم الحبل السري في مكان واحد

قارني وخذي الانسب لج

اما اذا ما اشتركت مع شركة فالمستشفى تاخذ دم الحبل السري حقهم مو حقج

مثل ما سار معاي في ولادتي الاولى في مستشفى الكورنيش (مادري حق المستشفى والا حق الممرضات اللي ولدني وحدة انجليزية والثانية امريكية) بعد ما طلع البيبي وحطوه على السرير نسوني انا والبيبي وانشغلن بالحبل السري اللي بعده متصل بالمشيمة قبل ماتطلع مني وسحبوا الدم منه (انا ماكنت اعرف شو يسون ولا خبروني)
بعدين عرفت من اختي،، طبعاً مو لي ولا لولدي (ماعرف هل هو للمستشفى عندهم تعليمات والا هن يبيعونه او حق نفسهم،،،؟؟؟؟ الله اعلم)،، لكن عن كلام اختي ان مستشفى الوصل يسألون الأم اذا تسمح لهم ياخذون دم الحبل السري ولا لا… بس حقهم طبعاً وانتي سألي تأكدي من الحين قبل وقت الولادة

فهذي المرة خذت احتياطي وسجلت مع شركة،،،

الله يقومنا بالسلامة ويقر عيونا بذريتنا