الحمدلله ربيت وعقبالكم ان شاءالله

السلام عليكم

حبيت أخبركم بتجربتي بهالولاده

أنا كتبت موضوع بتاريخ 15 من هالشهر انه كان ينزل عليه مثل سدادة الرحم بس ما كان عندي ويع بس كنت أحس ان الجنين يضغط على تحت هذا كان في النهار كملت صومي قلت يمكن مب ولاده والمغرب فطرت وبعد الفطور بساعة شربت عصير مخلوط ب3 ملاعق زيت خروع وصليت العشاء وبعدين سرت أتمشى وسرت الجمعيه أتشرى حق الصغاريه أغراض ناقصه

وابتدت عندي الآلام عالساعة 12 بالليل وابتدى معاي الاسهال من الخروع ، طبعا مايتني الطلوق إلا من بانت نتيجة الخروع

وكان الويع عادي يسير وايي ومحتمل لين الساعة 2 ابتدى يزيد وعالساعة 3وشوي وعيت ريلي وقلتله خلاص ما أقدر أتحمل يالله عالمستشفى

وسرنا ويوم وصلت فحصتني السستر وقالت 9 سانتي يالله على غرفة الولاده
ويوم وصلت الغرفه أحس بالويع بس ما أحس بضغط البيبي فقالت الممرضه خلينا نبطل الماي عشان تربين بسرعه بس أنا رفضت وقلت خليه لما يفتح من نفسه وعلى هالحال لين كملت ساعه بعدين يلسوا يقنعوني الممرضات والدكتوره ووافقت وفتحوا الماي وقالولي يالله بووش ، ويالله بوووش ثلاث وإلا أربع مرات والحمدلله ربيت

ومع انه هاي ثالث ولاده بس صارلي شق وخاطوه لي ، والحمدلله افتكيت من الثقل وعقبال الباقين

الله يسهل عليكم ان شاءالله