إلى جميع الأمهات في هذا النادي ماذا تقدمون لأطفالكم

الغاليه .. مشكلتج مثلي أنا ولدي بعد شهيته للأكل تعبانه ..

بس تدرين شو سويت أخذته المستشفى ووصفوا لي مقويات وفاتح الشهيه .. ولاتنسين المرضعه تشبع الياهل يعني بمعنى أصح لاتعطينه حليب في كل وقت .. يوم ينش الصبح سوي له صمون بجبنة وزعتر أو قطعة كيك أو فاكهة على الأقل ,, وحاولي تخلي الصحن جدامه عشان ياكل بنفسه جي أحسن ..

دائما عودي عيالج على أكل البيت أفضل وأنظف سوي له همبرجر منزلي مع أصابع البطاطا .. بيزا بالخضار أو الدجاج .. شوربة الشوفان …الخ.
أنا ولدي بدا ياكل في رمضان أكثر من الأيام العادية والسبب لأن الفطاير والحلويات والأكل على طول جدامه ,, وكل شوي ياكل شيء والحمدلله صحته بدت تتحسن ..

لا تخصصين لعيالج وجبات غذائية معينه لأنج أنتي راح تتعبين بعدين خليهم ياكلون من الأكل الموجود من طبخج عشان ما يلعوزج ويبدي يتأمر على كيفه ..ولا تعودينهم على أكل المطاعم مثل الهابي ميل وغيره لأنها فعلا مضره ..

أحرصي على العصائر الطازجه واللي فيها كمية من الحليب الطازج ,لا تنسين الفواكه مهمه ..

أنا ولدي أحطي له الألعاب وألعب معاه والحمدلله بها الطريقه ياكل .. وكل ما حسيت أنه أكل زين أقدم له هدية مثلا سيارة ولا طلعة بالسيارة ولا أي شيء ..

اتمنى أني أفدتج بشي ..