أعتبر نفسي أخطأت الإختيار .وأستاهل النتايج .

السلام عليكم بنات

بدخل في الموضوع على طول….

ما لقيت حد أفضفض اللي ابخاطري…وكلما أتكلم ويا حد أحس أكلم الجدار…

أنا مضايقة وااايد وااايد وااايد…

ليش؟

بنات أنا أدوام …من 4اسنين…ومرتاحة ابمكاني الحمدالله…كانت عندي علاقات ويا البنات في الدوام سطحية لا تتعدى السلام…بس بعد فترة تعرفت على وحدة ويانا وتقربنا من بعض واااايد..كانت تقول لي كل شي وأقول لها كل شي…ما نخبي عن بعض أي شي…أبد أبد…كنت أحس متعة الحياة في الدوام وياها..تتصل لي كل دقيقة وسوالف ومصخرة ويا بعض…جد كانت أيام وااايد حلوة…إهي من قسم ثاني…يوم أشتكي تسمعني ويوم أتكلم تفهمني..أحس بالراحة يوم أتكلم…

وفي القسم اللي أنا فيه …بعد بنتين محتكين وياي..وافدات …بعد أحبهم لكن يدخلون فيني ابكل شي…أنا طبعي طيبة…ومتفهمة وما أحب أجرح شعور حد وأواجه اللي يغلط علي…إنزين وين المشكلة؟

من تقريبا أقل عن سنة أو أكثر ما أدري…طلب مني المدير أدور على وحدة مثلي…مثل تخصصي يعني..وأشوفها مجتهدة واتريد العمل صح..فدورت وحصلت وحدة ادربت ويانا وكانت واااايد أوكيه…طيبة وهادية وحبوبة وفنانة وكل المواصفات العمل المطلوبة فيها ..وقلت لمديري…واتوظفت …

علاقتي وياها زينة ما يشوبها أي شي…بس الوافدتين من يت الموظفة هاي…يعقون علي كلام يجرحوني فيه…مرات يقولون إنها موظفة يديدة لا اشغلينها وايد…ومرات يحللون شخصيتي على كيفهم..ومرات يعني شي يرفع الضغط…

كل يوم كل يوم هاي حالتنا…ويوم ايقولون تعليق ولا شي..أضحك لأني ما أريد أرجع البيت وأنا مضايقة …أبا أستمتع بكل من حولي…

أنا كنت كل صبح أسير عند صديقتي…وأقول للموظفة اليديدة تعالي عندنا…فكانت اتي…وانسولف ونضحك نحن الثلاثة …لين الساعة 8وعقب انروح مكاتبنا …بس بعد فترة لاحظت إن صديقتي ما تهتم بي.وما تتصل مثل أول…وما أسوي لي أي احساب…وهي والموظفة اليديدة يسون كل شي وما يقولون…وحسيت إني مثل الأطرش في الزفة…وجودي وعدمي واحد….عاتبتها …قلت لها ليش اسوين جي؟؟ اتقول عادي نحن ربع..أقول لها صح …بس أنا املاحظة تغير فضيع…أنا ما أغار..أبد واحب الموظفة اليديدة…ما يعيبها أي شي…بس مضايقة من تصرف الصديقة والزميلات…

عاتبتها ثلاث مرات …في كل مرة اتقول لي حة يديدة لين ما أنا طفرت قلت خلاص أحفظ كرامتي وما بنزل تحت وبيني وبينها بس سلام…بعد ما عودت نفسي على هالشي…تموا يقولون لي ليش ما تسألين عنها ..ليش؟ليش؟ ياناس هاي علاقتي وياها…أنا أعرفها أكثر عنكم…أنا الحين عفتها بعد كل اللي أسوي عشانها خلوني ابحالي خلاص أنا مرتاحة من هالوضع…

قالوا لي من شهر تقريبا إنها حصلت على شهادة التميز..إتصلت بها وباركت لها ومن خااااطري فرحت لها….ورضيت ابروحي…وتميت أنزل مثل أول…بس يوم أيلس وياها أحس بالضيق…قلت لها ليش ما راضيتيني مع إنج تدرين إنج قصرتي ابحقي واايد…قالت لي بالحرف الواحد…أنا قلت للكل …جميلة غالية إذا يت ورضت ابروحها أنا راضية …وإذا زعلت برايها…في ذمتكم هاي صداقة اسمونها…أنا إنصدمت…صدق من الخاطر إنصدمت…بس طوفتها …لين يوم الإثنين…قالت جدام زميلاتي أنا يبت الألبوم وكلهم شافوه…بققت عيني عليها ….قلت خاينة …كلهم ضحكوا ..وأنا جاادة …جدا …وكررت خاينة…قالت لي إنتي ما نزلتي…كررت خاينة …لأني الحين خلاص بديت أطفر من هالعلاقة …حاولت أصلح…بس ما انصلح شي…وطلعت…والحين والله مرتاحة ما أريد العلاقة وياها أحس إني إنهنت واااايد…أنا مختصرة وااايد…عسب جذه اللي بيقرا بيحس إني امكبرة الموضوع…

أمس كنت في المصلى هي وباقي الزميلات موجودات …صلت وطلعت على طول…أنا كان عااادي عندي جدا…لأني والله عفتها من الخاطر…مب زعلانة بس عفتها كصديقة…قالت لي زميلتي(إنتي هيفة)مصرية طبعا …وأنا صدق تضااااايقت على الآخر…بس ما رديت لأن عندنا إجتماع فجائي…
رجعت البيت وأنا مضايقة بس من هالكلمة…تتحراني زعلانة من ألبوم ما شفته…وأنا كررت لهم مليون مرة أنا مب زعلانة عسب ألبوم…أنا أخطأت في إختيار صديقة وفيه…وخلاص خلوني عندي بنات خالي وعمي وأهلي وجيراني وصديقات العمر الثانوية والكلية…بس هاي لا …ثم لا …ثم لا …نحن مب يهال…صح ….لكن علاقات الصداقة مهمة…الكل يعق علي كلام يجرح ..وأنا حساسة وأنا وأنا….بس أعتقد هذيلا المتزوجات بس…لأن علاقات الصداقة ما تهمهم…
مضايقة واتعكر مزاجي على الآخر….
وقررت أسوي إجتماع ويا زميلاتي أفضفض كل اللي في خاطري…
أنا اللي في خاطري على طرف لساني…عسب ما أكره وأبغض حد…
بس لا حولة ولا قوة إلا بالله
ولا إله إلا الله
والله الله ربي ولا أشرك به شيئا…