أرجوووو المساعدة : قريبتي لم تعد تستطيع الكتابة !!!!!

التعديل الأخير تم بواسطة Dreamer ; 2007-12-29 الساعة 20:53

سبحااان الله..!!

والله ماادري يا اختي بس حبيت ادعيلها.

الله يشفيها ويعفي عنها..

وان شاء الله البنات يفيدونج..

المشاركة الأصلية كتبت بواسطة Dreamer

مرحبا بنات ..شحالكم إن شاءالله دووووم بصحة و عافية.. والله يشفي جميع المسلمييييين و المسلماااااات يا رب!!!!!

فيه موضوع حبيت استفسر عنه لانه المسكينة قريبتي وايد متعقدة من هالحالة..

الله يسلمكم هي من تقريبا سنة توظفت في مكان اول شي كان زين بس كثرة المشاكل هناك بعد ما دشت .. ومن تقريبا 8 شهور حست انها ما تقدر تكتب عدل شرات قبل ..يعني خطها صار غيييييير مع انه خطها كان وايد حلو تغير وايد ..الحين طلعت من الشغل لانه وايد عقدوهااا و وااااايد كراف ويريدون كل شي بسرعة ..المهم هي الحين تقريبا فقدت السيطرة على القلم ..ولا تقدر تمسكه عدل و تاخذ جهد لين ما تكتب اسمها حتى .. وكأنها توها تتعلم كتابة ..والله حزنت وايد عليها وهي تعقدت من هالسالفة و طلعت من الشغل اتقول كيف الحين بكمل حياتي وانا ما اعرف اكتب كيف بلقى وظيفة ثانية؟؟

احترنا و لا عرفنا من شو السبب .. فجأة صارت ما تعرف تكتب .. قلنا يمكن عين بس ما ادري هي عندها مشاكل في ظهرها والعامود الفقري خلقيا منحني ..وتعالجت علاج طبيعي و خف الإنحناء وصار احسن بس طبعا فيه بعده ألام ظهر من حين لأخر ..

والمشكلة الاكبر انها تستحي تخبر ايييييي حد بهالسالفةولا تبا حتى الدكتور إلي بيفحصها انه يشوف كيف تكتب ..لهدرجة ..

فسؤالي هو ..وين اتروح ؟؟ وكيف تعالج هالحالة؟؟ اتروح دكتور اعصاب و عظام؟؟ وياليت لو تخبروني عن دكتور معين في الإمارات وزين لهاي السوالف ..

والسموووحة

مرحبا الغالية والحمدلله نحن بخير وإن شاء الله الجميع بخير..واللهم آمييين.

حبيبتي من بداية الموضوع اعتقد أنه الحالة اللي هي فيه مب عضوية كثر ما هي نفسية، وهذا شيء طبيعي. لأنها تعبت من المكان اللي كانت فيه، ومش مرتاحة نفسياً من الضغوط، وشو اللي يطفر بالناس غير الضغوط..!! خاصة إنها كانت تكتب عادي يعني مب عيب خلقي! وللتأكد ممكن تشوف دكتور أعصاب يمكن شيء اتغير في الفقرات في الظهر وأثر على اعصاب اليد.

وإذا إن شاء الله مايطلع فيها شيء عضوي، أتوقع حالتها بتكون واضحة، وتحتاج لأنها تطلع الكبت والمشاعر الحقيقية اللي داخلها واللي تتهرب إنها تصارح حتى نفسها فيها، والضغوط النفسية مب هين إنها تكبتها وتحبسها داخلها، لدرجة إنها ما تقدر تعبر عن نفسها، وإنها ما تقدر تكتب معناته هذا نوع من الدفاع اللي اختاره جسمها إنه يسويه عشان يكبت أكثر مشاعرها أو يهرب من المواجهة، احتمال كبير إنه تحس بالاحراج إنها ماقدرت تنجح في مكان العمل، أو فيه ضغط عليها بأنها تكون مثالية يمكن من البيت أو الصديقات..وأشياء ثانية.
صعب شوي أشرح لج هنيه..والمختص أحسن يشوفها ويكلمها بهدوء وعسى خير.

إذا ما طلعت كل شيء ممكن يزيد عليها الوضع، أو يطلع شيء ثاني زيادة..

الغالية بلييييييييييييز بسرعة خلوها تراجع مستشار او مستشارة أو شخص مختص يقدر يحلل حالتها ببساطة ويفهم لوضعها بدون مايجبرها على شيء.
وأتمنى إنها ما تاخذ أي حبوب "نفسية"!!!! أرجووووووووكم ابتعدوا عنها.

الكلام الهادي المريح ممكن يفتح اللي في خاطرها بهدوء، وجلسة استرخاء وحدة ممكن تخلصها من كل شيء بإذن الله تعالى..

ممكن أختي أعرف هي من أي إمارة؟ إذا من أبوظبي راسليني على الخاص.

وسلامتها وأجر وعافية…وسلامي لها..
وقوليلها الدنيا ممكن تكون حلوة إذا اختارت اتشوف الحلو فيها.
وهي إنسانة لها كيان مهم جدا في الحياة، وراحتها مهمة أكثر من أي شخص،
لأنها إذا هي مرتاحة بتقدر تريح غيرها، وليس العكس.

دعواااااااتكم
والسموحة

الله يعينها ويشفيها