تخطى إلى المحتوى
الرئيسية » مابا اموت والله مب راضي عني

مابا اموت والله مب راضي عني

بسم الله الرحمان الرحيمو الصلاة و السلام على أشرف المرسليننبينا محمد صلى الله عليه وسلم

احس باحباط

بدت السنة اليديدة وانا حاطه ف بالي وايد اشياء
ووعدت نفسي ببداية يديدة وقرارات يديدة .. وحياة نظيفة
بطاعة الله ورسوله

بس
الواقع غير

كيف مرت السنوات وكيف استوى عمري 24 بدون ما احس
كيف ادمنت الجات .. كيف كلمت عشرات الشباب
كيف خليت علاقة وحده تحطمني وتدمرني ومن عقبها بديت درب الصياعة
واهمال الصلاة والذنووب اللي مالها اول ولا اخر

كيف يابنات
كيف

والله قريت هالكلام مليون مره ف مليون موضوع
ولا مره تعاطفت مع صاحبة المشكلة وكنت احسهم يبالغون

كنت حاطه ف بالي حد وللاسف ملج وتحطمت مب لاني احبه
بس لأنه كان القشة الوحيده اللي انا متمسكه فيها

جد يابنات والله ابا الستر.. ابا اعرس اخذ واحد لو يكون خسف ويلوع الجبد بس يكون حلالي .. ابا هالعاطفة المريضه اللي داخلي اطلعها بشي حلال

خطبني واحد من فترة واستانست وايد
بس ماصار نصيب
وقبلها انخطبت وبعد ماصار نصيب
وكل مره على هالحال

ساعات اوسوس واقول اكيد بسبة ذنوبي
او

المشكلة مستحيل انخطب من الاهل لاختلافنا ف اشياء مسببة شبه مقاطعه
ادري كل شي نصيب بس والله ابا ريال ف حياتي ابا حد يكون عندي مابي الغلط
ادري ان عيب اقول جي

بس والله تحرقني نظرات الشماتة من اهلي
تحرقني نظرات الشفقة من عيون امي

حرقتني الوحده
حرقتني ذنوبي

والله مابي افضفض لغير ربي بس احس عمري مخنوقه

بنات دخيلكم ادعولي يمكن تصادف ساعة استجابة
ادعولي بالهداية والستر
والله ماتمنى اموت والله مب راضي عني

يارب ارضى عني

يارب ارد شرات قبل واحسن

6 أفكار بشأن “مابا اموت والله مب راضي عني”

  2. عائشة
    الرد

    الله يعييينج الوحده اهي الي تخليج اتسوين جي
    حبيبتي اشغلي عمرج ف شي مفيييد
    وحاولي تستغفري قدر ماتقدري
    وخلي ايمانج بالله قويي وصلي قيام الله
    ربج غفور رحييييييم
    الله يهدييييييييج ويصلح بالج

  3. حياة
    الرد

    سمعت وااايد بنات يشتكون مثلج
    بس طبعا ما يصارحوني و يخبروني باللي يسوونه بالدسة

    على الأقل أنتي رمستي ،،، معناته أنتي جادة و تعرفين اللي تسوينه غلط
    بداية،،،،،،،،، لو مب قادرة ما بقول لج أبدي خطوة خطوة،، هالشي اللي أنتي فيه،، المفروض تقطعينه مرة وحدة و بدون تردد،، فكري ،، شو بيقولون عنج،،، "ما يهمج " هاي حياتج،، و كتابج شغال عليج،،، اللي بتتحاسبين عليه يوم القيامة،، ليش تترسين كتابج بأشيا ما تسرج في الآخرة،،،،، قطعي النت لفترة و غيري رقم موبايلج،، و أبدي صفحة يديدة مع ربج،،، متى ما حسيتي إنج جاهزة للإنترنت بدون خرابيط،،،، عطي عمرج بعد مهلة شهر،، و بعدين وصلي النت،،،،

    دايما فكري بالآخرة،، كيف بتتحاسبين،، فكري بعذاب نار جهنم و حرارتها،،، لا تفكرين " إن الله عفو كريم" فكري " إن الله شديد العقاب"،،، لين ما تحسين إن قلبج لا شعوري يحب الأشيا اللي تقربج من الله و يبعدج من الأشيا اللي تبعدج من الله………..

    متى ما بديتي مع ربج صفحة يديدة،،،، الله بإذنه بيرضى عليج و بيسعدج و بيرزقج بفضله.

  4. منيرة
    الرد

    حبيبتي الله بعون العبد حين يكون جاهز للتوبة والطريق المستقيم

    ولا تنتظري الزوج وتقولي هو من يكون النجاة ويصلح حالي لا وألف لا

    قبلك قالوا كذلك ولم يتوبوا لله وفتكروا ان الزواج سوف يعصمهم وللأسف لم يعصمهم

    التوبة أولا وأخيرا لزم تكون لله خالصة وكونك فاهمة هنا تحتاجي للأرادة القوية

    وقولي لم يفت الأوان وسوف أنجح بصلاح حياتي وطاعتي وتقربي الي الله لأن لا نعرف متى ساعة

    الموت قد تكون بعد لحظة فجعلي هذة اللحظة نية خالصة لله ويخسي الشيطان

    وحين تشعري بلذة العبادة والطريق المستقيم سوف تعرفي أنها سعادة ما بعدها سعادة

    الله يثبتك ويكتب لك طريق النجاة والخير والرزق ورضا الله بالدارين

  5. نور
    الرد

    حببتي الله غفور رحيم

    تقربي اليه بالدعاء بالصلاه بالصدقة بالاستغفار

    واكثري من الدعاء في الثلث الاخير من الليل

    وان كنتي فعلاً عندك رغبه في ان تصلحي من نفسك فأكيدبتتغيرين وبتردي افضل

    اصلح الله امرك وثبتك على طريق الصواب

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.